18歲美國青春女星Bella Thorne上周一宣布與拍拖一年多的男友Gregg Sulkin分手，事隔一星期竟由直變攣，更唔熟唔食，搭上哥哥Remy前女友Bella Pendergast，真係驚喜處處！
Bella周一晚在社交網Snapchat公開同「前阿嫂」Bella Pendergast咀嘴照，「SheShe」味濃，即引來粉絲留言：「你係咪雙性戀者呀？」Bella斬釘截鐵回應：「係！」一眾粉絲見到Bella「出櫃」都大表支持，讚偶像夠真，堅持做自己，搞到Bella感動回應：「多謝大家嘅留言咁支持我，我愛你哋！」然後加上三個心形表情符號及同志運動「pride」的標籤，應承會繼續打破社交網的傳統規範。
其實Bella於15歲時已認識「前阿嫂」Bella，當時對方仍跟阿哥一齊，怎料數年後她們竟會過電。其實最近一個月，Bella不時在社交網為攣情埋下伏線，跟Gregg分手前五天留言祝「前阿嫂」生日快樂，又稱對方為「靈魂伴侶」：「好幸運可以識到你！」又不時互講「我愛你」等，公然打情罵俏。