彭于晏輸佬味做邋遢浪子
台灣型男彭于晏（Eddie）前晚偕拍檔劉青雲及導演陳木勝在台灣出席新片《危城》首映禮，吸引大批粉絲捧場追星，場面墟冚！Eddie今次在片中自毀型男形象，除了黐上大鬍子外，又在臉上畫雀斑，似足髒亂又不羈的浪人，他謙稱：「我沒有古天樂的男人味，所以想要讓造型更貼近角色，就必須要做出這樣的『犧牲』！」對於能夠與青雲及古仔合作，他自言獲益良多。
劉青雲揮鞭造勢
飾演保衞團團長的青雲徇眾要求，即場表演揮鞭技術，又透露為拍攝《危》片而瘦了4公斤。首映禮上，陳導、青雲和Eddie進行「破億儀式」，三人齊齊按下機關倒數，舞台兩邊的綵球隨即落下寫有「大快人心」及「票房破億」的捲軸，預祝電影大賣！
古仔睇女排幾乎爆血管
另一邊廂，古仔「留守」香港拍廣告，並透露日前偕兩名小朋友開工，搞到腰痠背痛：「佢哋要同我玩騎膊馬同劍！（驚咗生小朋友？）咁又唔會，不知幾開心！」提到中國女排在今屆奧運大放異彩，古仔笑言「差啲爆血管」：「好鍾意睇直播，話晒四年一度喎！我睇緊女排，嗰邊又播男子沙灘排球，但我要出門口做嘢！」對於吳鎮宇街頭拍戲遭滋擾，他說：「我就最多係開工前或後有人掟水彈，大家小心啲啦！」
文：影視組