鄭俊弘堅稱唔熟苗僑偉：我絕對唔係嬲

歌手鄭俊弘（Fred）前晚出席數碼音樂平台活動，同場還有雨僑、連詩雅、何雁詩、韓國Hip Hop歌手PUNCH等。Fred與好友何雁詩孖住受訪，提到Fred被指偷嗒苗僑偉的索爆女兒苗彤，他隨即否認：「真係唔係，一啲都唔熟，嗰日係同何雁詩去朋友餐廳開張。」他強調真的不認識苗彤，當日食飯還有很多人在場，何雁詩亦幫口說：「嗰張相我都喺度，但完全忽略我。苗彤係我中學師姐，大我一年，係好好嘅朋友。」

大讚唱歌好聽

問到苗彤是否他喜歡的類型？Fred即謂：「唔諗啦。（封盤？）係呀，要做嘢。（要封幾耐？）再算啦，要問老闆。」講到報道指苗僑偉稱不認識他，Fred說：「我同佢未合作過。（唔開心？）唔會。（報道話你食女無數？）唔需要理呢啲炒作，佢哋想點寫就點寫，唔會影響到我。（唔驚影響你第時識女仔？）唔諗呢啲喇，做好自己先。」講到工作，他表示忙於錄歌，稍後會跟何雁詩、譚嘉儀拍旅遊節目：「遲啲要去加拿大做慈善show，所以幾忙。」

雨僑在新片中飾演從內地來港的女生。

連詩雅晒纖腰現身。

苗僑偉則替女兒澄清緋聞，強調沒有為此生氣，並大讚Fred唱歌好聽，他澄清說：「啲相係堆砌出嚟，件事都唔係咁樣！（話你唔識鄭俊弘？）我所謂嘅唔識，係彼此冇直接介紹過認識，咁我當然知鄭俊弘係邊個啦！佢唱歌咁好聽！（嬲爆女兒緋聞？）絕對唔係嬲，我個女都幫我澄清咗！」

雨僑苦練鄉音

此外，同場的雨僑透露稍後會拍新片，飾演從內地來港的女生，現時要努力練講不純正廣東話，她說：「我叫我啲鄉音朋友錄對白畀我聽，因為我唔想講出嚟好麻甩，所以要搵個溫柔嘅女仔讀對白我聽。」

文：音樂組

攝：張福宏