阿Sa焗住接花球 阿嬌驚嫁唔出
組合Twins、周柏豪、鄭希怡（Yumiko）及雷琛瑜（J.Arie）等昨日在九龍灣亮相英皇電影《原諒他77次》開鏡禮，英皇集團主席楊受成亦現身祝酒儀式支持。當中J.Arie化身新娘子，至於扮演姊妹的Yumiko在拋花球環節中接得花球後，轉身塞進旁邊阿Sa（蔡卓妍）手中，令阿Sa哭笑不得！
Mr. Right搭緊車嚟
事後記者笑言要恭喜阿Sa，她笑說 ：「幻覺嚟！明明唔係我接到。（大家好想你拍拖？）好呀！多謝大家。」身旁的阿嬌直言怕嫁唔出，故不會再接花球：「聽講接咗後半年唔嫁人，就三年嫁唔出。」提到阿嬌日前揚言歡迎異性追求，她笑言純粹講笑，但冇人行動。問到阿Sa會否介紹男仔？她笑說：「我自己都未搞得掂，呢啲隨緣。」
強調唔心急拍拖的阿嬌笑言被老闆楊受成問有冇拖拍：「老闆問我有冇仔同有冇人追？我答冇呀！（老闆都有個仔楊政龍？）人哋咁忙，老闆都叫我唔好，我會傷心o架！」阿Sa笑指Mr. Right正在前來：「佢搭緊車嚟！（坐電車？）電車都有總站。」問到阿嬌若找到真命天子會否介意閃婚？她說：「要了解夠先，Plan好晒都冇用，人哋唔嚟娶。」而Yumiko被問到是否好想阿Sa拍拖？她稱希望身邊人幸福，又爆阿Sa多人追：「知情但唔講。」
同場的柏豪表示在戲中與阿Sa發展到談婚論嫁階段，問到現實中何時結婚？他希望搵「雙倍」身家才成為「兩家之主」：「想有能力先，起碼要搵依家Double嘅錢！我鍾意照顧人，等身邊人唔使煩。（婚後唔使老婆工作？）想佢專心照顧家人。」
文：影視組