展鵬定欣拍時裝版武則天再打過

由胡定欣及陳展鵬主演的無綫劇集《城寨英雄》尚有個多星期便大結局，觀眾追得相當過癮，此劇動作、搞笑、感動位都做得相當出色，不論主角、配角及綠葉都做得出位，而此劇監製文偉鴻於九月中會開拍新劇《同盟》，銳意沿用展鵬及定欣做主角，而金像影后鮑起靜更會參與拍攝。片乃動作劇，當中有不少以色列搏擊術及槍戰動作場面，監製文偉鴻透露劇情會是時裝版武則天，聽落都引入入勝，而展鵬及定欣則要繼續打，還比《城》劇打得更瘋。

為角色學槍械

展鵬於亞視年代時已多次跟鮑姐合作，二人曾於感人劇集《笨小孩》中飾演母子，展鵬受訪時說：「之前同鮑姐傾過電話，佢講過會拍一套劇集，估唔到公司安排到我同佢一齊合作，真係好開心！（監製話你同定欣旺佢？）其實《城》劇好多演員都係有心有力，大家都付出好多誠意同努力，一班同道中人拍劇係好有共鳴、好開心，無論做乜都好，最緊要有一個好嘅班底。」而定欣受訪時說：「我同鮑姐係第一次合作，聽到好開心，我知佢同展鵬合作過，整個班底都好期待。」談到監製指她與展鵬旺他，定欣說：「旺佢咁就好嘞！希望大家互旺啦！」她坦言今套劇要打得好犀利：「監製話要學槍械，依家自己真係做咗打女咁！希望一次型過一次！」

搵舊愛馬國明拍？

有指此劇原本找馬國明與舊愛定欣拍攝，但因馬國明合約問題，故換來人氣高的展鵬拍，對此監製力挺說：「呢套新劇係我拍《城寨英雄》中期，專登為展鵬及定欣度身訂造，所以呢個報道完全失實。」而馬國明受訪時坦言報道真的「笑吓就算！」另外，前晚劇情中，有一場定欣及展鵬為了邪住爛賭老竇魏惠文齊齊晒紅，定欣更露紅Bra帶，之後更向着對方說「小你」，相當搞笑！

文：影視組