馮盈盈兇狠喪嗌挽聲勢
十位候選港姐昨日於日本福岡踏入第三日外景拍攝，上午到櫛田神社學習劍道時，一改平日斯文形象，變成兇悍的「老虎乸」！「甫士王」(6)馮盈盈（Crystal）最落力，不時面露「狠樣」，似乎為前日泳裝環節身材「消失」挽回聲勢。Crystal向「劍橋Angel」(1)關可欣喪劈喪嗌，氣勢十足，連監製都直豎拇指讚Good，她受訪時稱學過泰拳：「打得要有勁有力，導演話咁先似習武之人。（泳裝環節失色要加倍落力？）冇話輸定贏，每次贏嘅係經驗，個個女仔都應導演要求好努力去做，自己冇特別傷心，又唔係負面新聞，啲相好靚，好興奮，親友、男友都傳訊息叫我加油。」
而(5)蘇韻姿（Andrea）和(10)單文柔（Phoebe）起初表現雞手鴨腳，但當Phoebe一句「你當係你Best Friend搶咗你男友咁劈」後，激發Andrea的小宇宙，愈劈愈有火，搞到Phoebe先後被擊中手指和面部。而Phoebe亦應要求向對方腰部連劈十幾下還擊，談到手指受傷，Phoebe說：「一定痛嘅，但好難避免，我有報番仇(口架)！」而被劈腰的Andrea則稱：「少少痛啦，大學時玩跆拳道、跳舞都有受傷。」
佳麗「互劈」後，下午換靚裙到福岡天神街頭取景，齊齊Chok爆狂轉甫士，當中以(4)代蓮曦丹美表情最多最搶鏡。