古天樂眼神懾人劉青雲冇晒符
古天樂與劉青雲「破格」演出新片《危城》，身為影帝級人馬的青雲大讚古仔眼神懾人，令他無可奈何。戲中二人關係對立，古仔更將青雲倒吊浸入酒缸，搞到青雲差點窒息，古仔直言演出時倍添壓力，青雲安慰他：「NG咗幾次，算合理啦！」
古仔與青雲合作次數「十隻手指數唔晒」，近日再於寰宇新片《危城》鬥戲。導演陳木勝將二人「洗底」，由青雲扮演保衛團團長，而古仔「處男下海」演以殺人為樂的富二代。談到合作的難忘事，青雲直言對古仔的眼神無可奈何：「佢幾做到嗰隻唔怕死、唔識驚、殺人唔當係一件事嘅狂魔，由我帶領嘅保衛團真係冇晒佢辦法，大家只可以預咗作出最大嘅犧牲！」
無懼損形象
對於陳木勝的刻意安排，古仔坦言：「作為演員真係乜都要試，今次係導演驚過我，選角前後反覆問咗我幾次驚唔驚影響形象，佢好似幫自己洗緊腦咁。」為投入角色，古仔稱要走入導演的內心世界：「要了解導演嘅想法，因為佢不斷作出更改，臨場都有新構思。」
談到今次的重頭戲，古仔將青雲整個人倒吊浸入酒缸，古仔笑說：「有咩差錯又要NG再嚟過，我好有壓力。」樂天的青雲即安慰拍檔：「咁都係拍咗幾次啫，合理嘅。」他又指今次是難忘經驗：「原來倒吊首先入水嘅係鼻孔，所以我將棉花塞入鼻同耳仔，正式拍攝時就閉氣，不過原來倒吊係好難忍住啖氣。（好驚？）又唔會，有咩事咪叫佢哋拉番我上嚟囉！（好信工作團隊？）都係嘅。」
錯手鞭自己
算是入行以來首次認真拍打戲的青雲，自言拍攝過程僅受輕傷，算不上危險：「係我手持嘅皮鞭有柔韌性，用唔啱力會回彈，打番自己啫，點都危險唔過拍時裝動作片，分分鐘又爆炸又飛車。」
談到暑假檔對手強勁，二人對票房卻未有太大壓力，古仔形容每套電影自有它的「命運」，而青雲則坦言：「當然想佢好成績，但演員只可以盡力做好件事。」
髮型：Dan Tam@Pi4（古天樂）、Jun ho（suave）（劉青雲）
化妝：Carmen Man（古天樂）、Monida Tse（劉青雲）
場地﹕the mira Hong Kong
文：影視組
攝：劉斌