張繼聰帶欣宜爆房
藝人張繼聰昨日與鄭欣宜到佐敦一間時鐘酒店「爆房」，兩口子開房不成，與谷胸爆鈕的職員陳詩慧理論，期間大派「鹵味」，令陳詩慧勁緊張！
張繼聰、鄭欣宜與陳詩慧（Eva）昨日到佐敦一間時鐘酒店拍攝新片《西謊極落：來自太空艙的你》，飾演情侶的阿聰與欣宜均表示首次踏足時鐘酒店。談到與欣宜演情侶，阿聰說：「幾創新！呢部戲講年輕人面對土地問題，冇地方繁殖，貼地得嚟又瘋狂，似Cult片！（年輕時有冇呢個煩惱？）咁我比較瘦嘅，唔使好多位！我覺得呢度幾寬敞，似卡拉OK房。平時即使喺樓下行過，都會走快兩步，費事畀人影到又多嘢寫，不過呢度附近有個停車場，出咗名位窄難泊，我有次泊完成身汗，刮花咗車門。」阿聰太太謝安琪自宣布停工後屢傳有喜，問到是否有好消息公布？阿聰說：「有喜呀！我有工開就係喜事！多謝全港市民咁幫我哋打氣，隨緣啦！有喜事會公布。」
投入到熱血沸騰
欣宜則表示會演好親熱戲，她說：「呢部戲講我哋不斷為咗親熱，但搵唔到酒店，搞到好熱血沸騰！（同謝安琪熟，唔敢同阿聰咁親熱？）我好敢親熱喎！做演員要投入，要放低自己先得！」至於Eva則以谷胸爆鈕造型現身，她說：「非常唔慣！公司同事話搞到佢哋七孔流血！（攝咗幾個Pad？）都係大咗半個碼啫！我本身好有睇頭，平時深藏不露！戲中我仲有唔同造型，我會用『爆』嚟形容，詳情唔講得，總之非常驚喜。（阿聰對白中有粗口，有冇壓力？）其實我第一次拍戲已經緊張，加上Joyce（欣宜）同阿聰都係好戲之人，我會有壓力，但佢哋好肯幫我。」
文：影視組