黃子華耗洪荒之力冇得抖
黃子華與陳法拉順利演出三十五場的舞台劇《前度》，前晚台前幕後拉隊到銅鑼灣消夜慶功。子華表示仍然冇得抖：「要還廣告債，仲會同蕭定一合作拍喜劇。（舞台劇演出順利？）我都用咗洪荒之力o架，中間病咗三日。（食禁藥？）係呀，所以唔踩得單車、唔做得運動囉！」
至於法拉則會在港多留一星期拍廣告，然後返美國繼續學業。問到是否捨不得？她說：「都係，最快聖誕返嚟！要搵食，所以幾日都返嚟，不過兩年時間好快就過。（無綫搵你拍劇？）好似搵經理人傾過，不過我唔可以接時間太長嘅工作。（今次返嚟演舞台劇做暑期工，夠畀剩低嘅學費？）梗夠嘞！多謝老闆。」