苗彤獲老竇教路： 要Open啲！
港姐十強誕生，昨日十位佳麗與大會攝影師苗彤齊齊出發，到日本福岡進行一星期外景拍攝。作為苗僑偉和戚美珍女兒的苗彤，昨日戴上Cap帽打扮樸素現身機場，並透露父親叮囑她不要驚青，要Open啲。
《2016香港小姐競選》的最後十強昨日出發到日本福岡拍外景，藝人苗僑偉和戚美珍的女兒苗彤擔任大會攝影師，亦隨團出發。這位「星二代」遺傳母親的美麗基因，一直被游說參選港姐，不過苗彤只想專注發展事業，在加拿大開設工作室並當上攝影師，打扮亦恰如其分相當樸實。
專注攝影暫拒入行
問今次擔任港姐攝影師有甚麼準備？苗彤說：「相機啦！但呢部都係問朋友借。（今次合作點促成？）都係跟父母有關，既然機會嚟到就要好好把握！（見過班港姐？）之前見過，每個都有不同個性，希望可以影到佢哋嘅特質出嚟。（父母畀貼士？）爸爸叫我要Open啲，唔好咁驚青。（苗僑偉話女兒未同佢影過相？）係呀！爸爸都好忙，我哋好少見面。（佢太Chok唔影？）係呀，佢好Chok，我係想影佢自然啲！（有冇興趣入行？）自出世以嚟自己就好似入咗行咁，做幕前係有興趣嘅，但暫時專注影相先。」
馮盈盈影泳裝興奮
同行的熱門佳麗(6)馮盈盈帶備了不少乾果出發，問零食為何不選朱古力？她笑說：「朱古力、薯片呢啲好有罪惡感，我節食中，（怕過度節食而頭暈嗎？）唔會過度，之前見過營養師，主要食高纖食物，食足三餐o架！」說到今天拍泳裝外景，馮盈盈即興奮地說：「吓！真o架？（有乜準備？）冇問題，準備好晒！（點解講嘢咁快咁興奮？）係呀，我一開心就會咁o架喇！」
至於(10)單文柔未有節食，反而帶備了不少朱古力作零食，笑言要在辛苦工作後獎勵自己，問拍泳裝照有何準備？她笑說：「心情緊張o架，到時要縮肚，其實都有Keep Fit，但未去到最Fit，間中都會偷雞一兩餐放肆吓！」
文：影視組