黎耀祥八戒變悟空冇得Hea

藝人林夏薇與黎耀祥昨日為聲演動畫電影宣傳,祥仔笑言今次聲演孫悟空與以往飾演豬八戒最大分別就是冇得hea。林夏薇則表示今次投資7位數,對於早前一輯性感泳裝照獲網民激讚,她坦言已是性感極限。

林夏薇及黎耀祥昨日到九龍塘出席動畫電影《西遊記之大聖歸來》宣傳,夏薇不但購得此片香港及澳門版權,更首次為動畫配音。投資有道的她早前在網上分享泳裝照,晒背露小蠻腰,獲網友讚Fit到漏!她說:「輯相係老公影,佢影相好好。(搵老公操刀再影輯性感啲?)嗰輯已經係我嘅極限。」

唔得閒造人

提到親自上陣聲演動畫電影,林夏薇說:「我第一次配音,聽完祥哥(黎耀祥)配,我即刻返屋企不斷睇熟個動畫,希望盡快進入角色。(會用卡通聲嗲老公?)唔會,我分得開嘅,而且我配嗰個係和尚仔呀!(會繼續投資電影?)要睇情況,今次投資咗7位數字,我稱唔上咩投資大亨,只係希望大家支持全華人製作嘅動畫。(頭先同小朋友玩得投契,幾時生番個?)都係嗰句,唔抗拒生小朋友,但要有時間先得。」

四演《西遊記》

而黎耀祥曾於電視劇扮演豬八戒,角色至今仍叫人印象深刻,今次再參與《西遊記》作品則帶來新鮮感:「今次我配孫悟空把聲,同做豬八戒嘅分別係,做豬八戒可以hea啲。雖然以《西遊記》嚟講,我做過兩套電視劇,客串過一套電影,再加埋呢個動畫,但始終係唔同角色嚟嘅!(林夏薇話佢好緊張?)佢配得好好,聲音好啱個角色。」

文:影視組