Daisy操定腹肌殺入決賽

20位準港姐昨日以二人一組分別揭曉十強名單,有佳麗雙雙進身決賽,亦有人手牽手慘遭淘汰!多位賽前熱門佳麗成功殺入決賽,將赴日本福岡拍攝外景,當中(4)代蓮曦丹美(Daisy)操出腹肌體態最搶眼,在當地影泳裝定必加分,令(6)馮盈盈、(7)陳雅思等熱門佳麗均視之為勁敵!

《2016香港小姐競選》昨日從二十位候選佳麗中誕生十強名單,包括(1)關可欣(Angellica)、(2)劉穎鏇(Tiffany)、(3)張寶兒(Bowie)、(4)代蓮曦丹美(Daisy)、(6)馮盈盈(Crystal)、(7)陳雅思(Bonnie)、(8)阮嘉敏(Mandy)等悉數入圍。而(5)蘇韻姿(Andrea)、(9)陳睿雯(Cherub)、(10)單文柔(Phoebe)亦爆冷殺入決賽,十位佳麗將飛抵日本福岡進行外景拍攝。

推廣環保教育

Daisy操不算流利的廣東話,不過在台上表現穩定,加上弗爆身形,在十強當中仍被睇高一線!問到會否帶備健身器材於拍外景期間操練?她笑說:「會帶定啲器材去隨時拉筋,想Keep住身材同精神狀態。(見過攝影師苗彤?)係呀,覺得佢作品好靚。」談到早前被拍得於蘭桂坊執玻璃樽回收,Daisy表示:「收到保母電話問我去咗邊,先知自己畀人影咗,自己係學教育,覺得同環保好有關係。」

而同為大熱的馮盈盈與陳雅思齊齊接受訪問,馮盈盈自言不覺熱門:「唔好咁講,每個人都有機會,自己平常心面對,去到日本會更加努力。自己未執行李、錢都未暢,冇預計入到圍。(大熱都冇信心?)其他人睇自己,同自己睇自己係兩回事。」

陳雅思早部署

陳雅思則說:「自己都會平常心,淡定面對。(最後一組出場最緊張?)唔會,反而綵排嗰陣緊張啲。」講到在日本會有泳裝拍攝環節,她說:「已經知嘅,Keep Fit唔係一時三刻,三十強已經準備緊。」講到Daisy身材勁Fit兼有腹肌,馮盈盈表示:「有留意到,係我嘅努力目標,係一個考驗同難得嘅機會,想Keep到好身材影靚相。」

文:影視組