袁偉豪 王君馨 功夫情人 打者愛也

唔賣肉，冇嘢賣！

袁：袁偉豪

王：王君馨

袁偉豪和王君馨於2007年參選港姐及港男入行，同期出道的二人過往合作多飾演舊愛，今次終於可以「戀愛ing」，在《城寨英雄》演情侶！相隔數年再遇，Grace大讚Benjamin變得更Man、更穩重！

袁：我哋之前喺《飛虎II》同《On Call 36小時II》都係演對方嘅前度，其實我哋係同年參加港姐同港男認識，之後合作過《舞動奇蹟》一齊跳舞，我係第一屆，佢就係第二屆。

王：今次終於可以「情侶ing」！Benjamin Man咗同穩重咗！

袁：穩重咗？我係重咗，磅數多咗！

王：佢身形更加靚，我記得選港男嗰陣，佢嘅身形殺晒，仲攞個結他出嚟，又文又武呀！

袁：好彩係又文又武，唔係話我「吔文吔武」啫！大家隔幾年再合作感覺成熟咗，大家都有成長，再埋位就感受到。

兩人大爆開工前監製已講明拍戲要「剝衫」，所以齊齊為劇集操肌。Benjamin練成爆肌身形深得觀眾歡心，他亦自認大隻，令身旁Grace忍不住出手調戲！

王：我哋兩個都鍾意健身！

袁：我依家賣肉嘛，唔賣肉冇嘢賣！肌肉呢個元素本身有，如果某個角色需要，既然有就不如做啦！拍呢套劇第一樣嘢，監製就話我要除衫！

王：佢都係咁同我講，哈哈！因為我係脫衣舞領班。

袁：為咗滿足編劇需要，我密密操練3個月。我睇番「牙佬」（《城》劇角色暱稱）着恤衫都覺得自己幾大隻，感覺幾穩陣，個胸肌谷到好高！

王：佢條夾褲帶好吸引，我好鍾意彈佢條帶！

袁：我想向佢報番仇，但又唔知掹番乜嘢好！

袁偉豪在新劇打不停，即使談情亦要過兩招。

監製講明要除衫，Benjamin完全冇有怕！

我個Pat pat又靚又圓！

Benjamin坦言不介意觀眾將焦點集中在他的肌肉上，更自爆有人讚他的屁股夠圓夠靚！他為造型花盡心思，首度戴眼鏡演戲的他一度未能適應，有點力不從心。

袁：呢啲係Package，不過我希望除咗身形，演戲都有人睇。不過冇辦法，因為我個造型件衫係靚，條褲又好Fit，有人話我個Pat pat好靚又好圓！

王：佢Pat pat係OKo架！我淨係望肌肉，冇諗其他嘢o架！

袁：嗰期運動狀態好足夠，所以每Part肌肉都好挺、好結實。我試造型時，一着套衫就覺得有氣質，所以特別再揀番一副啱我嘅眼鏡。不過演角色初期，我戴咗眼鏡就好似唔識做戲，壓住咗自己，但錯有錯着，角色就係要咁沉着同冷靜。

袁偉豪深信機遇處處，耐心等待發揮機會。

王君馨捱到入院，病愈就思考來年目標。

Benjamin和Grace在劇中分別飾演牙醫和脫衣舞領班，深藏「八極拳」底子的兩人因惺惺相惜而相戀。Benjamin笑稱連談情都要打埋一份，以功夫傳情！

袁：我哋嘅愛情故事好淒美，全靠一碗芽菜解酒湯撮合。

王：我哋不打不相識，一嚟就對打！

袁： 我哋都識八極拳，會用功夫調情，好似跳Part舞咁！

王：為咗令隻手厚身啲同有力啲，我買咗包米嚟劈！我喺超市揀米時，一劈落去就「啪」一聲，成間超市嘅人都望住我！

袁：第一日開工，功夫鞋好薄，紮馬步又要好用力，所以壓實咗腳趾。我拍完覺得隻腳好痛，原來左右兩隻腳趾公都瘀晒同黑晒！用咗1年時間先褪晒瘀血，有次唔覺意仲踢到爆腳甲，發現入面已經生番新肉。其實好小事，男人嚟嘛！

王：我都幾鍾意打，但最辛苦係着高踭鞋打八極拳。我右腳韌帶本身撕裂咗九成，今次拍劇成日卡住喺韌帶位，好彩冇整親，應該再整親就會斷。我試過唔記得退後，畀吳家樂轉身批中咗手臂，結果捽咗1個月跌打酒。

受傷嚴禁撒嬌

為拍劇打到傷痕纍纍，性格硬朗的他們卻受了傷亦不主動告知另一半，以免愛人擔心。Grace拍畢劇集後病倒入院，此時才願意通知身在美國的男友。

王：我冇話佢知撞傷，唔想佢擔心。不過我拍完劇就因為胃抽筋入院，當時拍一場裸背療傷戲，拍攝前唔敢食嘢，之後入院兩日，醫生話係個胃發炎同埋有咽喉炎，可能係因為我成日要嗌要打。我直到入院先話畀男友知，佢嗰時先擔心，我食咗一個月抗生素，身體好番就諗仲有咩想做，今年想嘗試做舞台劇同做生意。

袁：我都冇同女朋友講，受傷呢啲自己知咪得囉！唔好話男女朋友啦，有時甚至同家人，我都唔會講。第二日又要返工，撒嬌唔係呢個時候撒，留番拍完先啦！

最近上位躍升男主角之位的袁偉豪儲夠自信，準備迎接各種新挑戰，Grace則高呼「未夠喉」，想再合作演喜劇放笑彈！

袁：Challenge？嚟囉，我得o架喇，做人最緊要有信心！其實我不嬲有信心，2007年入行初頭可能做戲都冇人留意，但我都有信心，堅信只係外來因素令人未注意到我，我會愈嚟愈多嘢可以騷畀觀眾睇！

王：我希望再同佢合作，佢嘅演出我都好投入睇，睇到少女心返晒嚟！

袁：可以試呀！我演過動作同愛情戲，但未演過喜劇。我諗演喜劇要夠頑皮，曳都係Part of me！

後記有音樂 冇壓力

最近因爆肌身形及矯健身手而獲封「男神」的袁偉豪有動態一面，亦有靜態一面。自小已學習彈結他的他，見到擺放在一旁的結他即兩眼發光，其後仔細地為結他調弦，愛不釋手！他閒時愛彈結他減壓，說：「以前都有同朋友夾Band，我鍾意聽音樂，有時間都想Pick up番樂器，好減壓！除咗演戲，我都有自己生活嘅品味同興趣。」有樣有身材又識玩樂器，Benjamin要迷暈粉絲簡直係Easy job！

場地：Friends有情有意

王君馨化妝及髮型：Phoebe Yung、Jamie@Hair

王君馨首飾：DearestGrace

王君馨服裝：Lapeewee@noveltylane、Dare to Dream@noveltylane

袁偉豪鞋履：Cole haan

文：影視組　

攝：劉斌