麥明詩遇「傳媒村老鼠」捱餓報警

早前各地傳媒頻頻爆出巴西里約熱內盧奧運選手村問題多多，傳媒村同樣危機四伏外，里約的治安亦備受關注。身在當地為無綫擔任奧運節目主持的港姐冠軍麥明詩（Louisa）一行人等亦不時「中招」，不但有工作人員房間「爆屎渠」，她更親身遇到廁所「跌鋅盆」怪事，既好嬲又好笑！當以為他們可以否極泰來時，原來衰運依然，壞事接二連三地發生，在香港時間前晚，Louisa於直播中自爆再度成為受害者，藏在房間的現金不翼而飛！

借麵頂肚 多謝陳恩能

Louisa表示遇「傳媒村老鼠」後，回覆本報時憶述事件經過，她說：「前晚返房，發現唔見咗啲錢，唔見咗五分一，大約四位數港元，已經報咗警！」雖然有金錢損失，但她非常樂觀，當破財擋災，又自誇非常Sharp醒：「我冇擺晒啲錢喺行李度，有五分四放咗喺身，所以個賊只係偷咗五分一！」她估計清潔或維修技工所為，又表示護照及貴重物品都有跟身，所以沒有慘遭「毒手」。自言有買保險的她更着大家不用擔心：「淨係要問人借即食麵醫肚！」

據知，Louisa在當地工作非常繁忙，不但要採訪賽事，亦要拍攝專題特輯，所以就算有餘錢都未必有時間食飯，幾乎餐餐即食麵。對此，她說：「大約七日裏面有四日係即食麵，有兩日飯都冇得食，只好每日朝早喺傳媒村食個飽啲嘅早餐。」而其好拍檔陳恩能（丹尼爾）知道她被賊人偷錢後，於事發當晚請她食飯定驚，她非常感謝對方雪中送炭：「雖然味道真係好『美式』，但就係好豐富，所以好開心！其實『丹生』同我父母係好朋友，所以感受到啲家庭溫暖。」

林作拒施援手：佢有家底

至於Louisa的大狀男友林作，知道女友錢財被竊後，問到需否接濟女友，他笑說：「唔使啦，幾百蚊美金啫！佢係有家底嘅！」再問到有沒有安慰女友，他大讚說：「佢好鎮定，冇事，好有大將之風！」

文：影視組