盲俠子丹打到上月球

「宇宙最強」甄子丹與內地影帝姜文有份參與的荷里活電影《俠盜一號：星球大戰外傳》（Rogue One：A Star War Story）有新預告片推出，不少角色終有對白，片中飾演盲俠Chirrut Imwe的甄子丹造型相當有型，並有一對灰白眼睛，現實中子丹亦因這個造型變了「盲公甄」。他說：「呢個造型係要戴一副特製嘅隱形眼鏡，一戴就差唔多睇唔到嘢，同埋會眼痛，所以每兩個鐘頭就要除一除，夜晚又要滴眼藥水，過程真係幾辛苦。」

對票房零壓力

片中，子丹一口氣掃低十數個白兵，他笑言拍攝時感覺似「打到上月球太空」頗為有趣，對於新預告終出現對白，他說：「啲宣傳片好似一朵花咁，一瓣瓣咁打開等觀眾愈睇愈多，今次有埋對白，好重要，反映到角色最有意義嘅地方，就係涉及星球大戰嘅重要精神『原力』。」而姜文飾演重炮手Baze Malbus，二人繼電影《關雲長》後再合作，子丹笑言：「佢啲英文愈嚟愈勁！」提到電影將於今年聖誕檔上映，子丹直言沒有壓力：「《星球大戰》電影係全球矚目電影之一，壓力，應該係其他對手，唔係《星戰》！」

詩詩倍感自豪

另外，子丹太太汪詩詩昨日出席代言的護膚品牌活動，笑指年紀漸大要開始保養，又表示有收看奧運，最愛看游泳，讚中國隊男運動員英俊，「火雞姐」傅園慧很Sweet！對於子丹的電影《星戰外傳》推出新預告片，她興奮地說：「之前同仔女去英國探佢班，因為佢要補少少戲，個仔係大粉絲，仲即場耍功夫畀導演睇，哈哈！」詩詩透露看到預告片時毛管戙，因一齣從小就看的電影，子丹能參與其中，感覺奇怪又自豪！

文：影視組、名人組