Celia K.賣自家手袋Face to Face吸客
夫妻檔做生意，真的鬧交多過食飯？模特兒郭穎兒（Celia K.）打破以上定律！Celia的老公李冠峰創立潮牌手袋多年，今年六月雙劍合璧，共投資六位數字開設實體店，計劃年內在大陸開分店。CK表示要感謝老公，因為手袋店令她重拾自信，尋回踏實感覺。
在電影《喜愛夜蒲3》飾演「豬扒」獲網民讚好的女星Celia K.，最近升呢成為潮店Choice的老闆娘，稍後更會在廈門、蘇州及上海等地開店。她的老公李冠峰出售自家設計的手袋Choice多年，早前與CK合力投資六位數字在人流旺的太子聯合廣場開設實體店，由CK全權打骰及參與手袋設計，6月開店至今，生意額不俗。
大把星級捧場客！
CK早前親自上陣，以性感及高雅造型拍攝宣傳照，而女星伍詠薇、陳嘉桓，甚至內地男星佟大為等都是捧場客，CK說：「伍姑娘會提供好多意見，例如設計同手袋大細咁，好與唔好都會講，想我哋喺設計方面有更大進步空間！」
CK本身有開設網店，對於開實體店有另一番體會，她說：「始終呢個牌子已經成10年，儲落咗一班Fans，但係點樣吸納多啲唔同年齡階層嘅客呢？就係要諗多啲款式，例如喺手袋加代表自己個名嘅英文吊飾。開網店成本當然低好多，但實體店嘅好處係可以直接知道客人嘅需要。」加上經常在店舖坐鎮，客人更覺有信心保證，CK說：「有啲客見到我都好出奇，但覺得有質素保證。由於真係有好多翻版假貨，我哋會整埋QR Code做防偽記認，試過有內地客拎個假袋上嚟，我見佢買咗假貨咁慘都打個折。舖頭喺Facebook、instagram、微信同淘寶都有『choiceasia』戶口，畀客人知道品牌最新消息，同埋有官方認證。」
做生意贏自信心
CK自問個性較硬朗，幸而與老公的性格一凹一凸，合作無間，她說：「其實我反而要多謝佢，因為呢間舖頭真係畀咗好多自信我。無論拍戲行騷或登台，始終都唔會有好直接嘅反應，尤其喺娛樂圈真係只有人揀你，要等一個機會真係唔易。依家開舖頭，做得好與唔好客人都會好直接咁話你知，感覺好實在。」
Profile
開業時間：2016年6月
店名：Choice
地點：太子聯合廣場
投資：六位數字
舖租：2萬多元
每月支出：5,000至1萬元
文：專案組