湯寶如被洩私隱嬲爆誓追究

湯記昨日在博微打出四個大字「法律追究」，並留言：「太過分了。這是私人交易，怎可以把這相片和文件放在微信和微博，亦可能再有放上其他平台上，一切以法律追究。」並顯示被流傳的一張湯記手持的「授權書」照片，而當中回鄉證號碼已被湯記事後「加工塗黑」。

其實藝人的個人資料在內地「被曝光」可謂屢見不鮮，尤其當紅藝人最易成受害者，過去如范冰冰、高圓圓、李敏鎬的證件相都曾流出，而最深印象是韓國Oppa宋仲基在內地過海關時遭瘋狂拍下護照相，雖然資料有「打格」，但行為已嚴重侵犯私隱。而今次湯記的回鄉證號碼則遭「冇格仔」完全公開，難怪湯記「火都嚟」！

要求書面道歉

昨日聯絡湯記，對被洩私隱一事，她稱：「其實我影呢張授權書係畀嗰個廣告商嘅，唔知點解會網上出現，仲要回鄉證號碼都冇遮，呢啲係私隱嚟，所以點都好，我都要求佢哋道歉！（廣告商有冇同你交代？）佢哋話會書面向我道歉，都有交代。（知道你話要法律追究？）因為證件資料有可能被人盜用，會好大件事，咁大家都想和平處理，唔想有損失嘅。（可會影響與該商品合作？）又唔會，因為同佢哋都合作過，之前冇發生過啲咁嘅事。（如有任何損失要求佢哋負責？）梗係要，如果被人盜用咗資料都會向佢哋追究。」

加設保障條款

據湯記所知現有關方面已將相片刪除，但經今次事件後，湯記表示為保障自己，事前若要提供個人資料，會附設聲明及條款，如所簽授權書在不知情下出現網上平台會追究。

文：音樂組