蔡毅明6位數創旗袍品牌

當模特兒近十年的Grace，現身兼旗袍設計師及製作公司老闆。她表示對旗袍的興趣始於多年前一個時裝騷：「以前做模特兒幫過一個旗袍品牌行騷，印象好深刻，之後我仲買咗幾件着，覺得好有味道。」直至2011年，Grace毅然決定創立自家旗袍品牌：「我本身係讀時裝設計，做模特兒接觸好多靚衫，學到顏色同布料配搭，之後做製作公司同好多時裝品牌合作，學到點樣去營運一個品牌，所以就想試吓創立自家品牌，邊做邊學。最初投資唔多，但發展起來都要六位數，因為我用嘅係靚料，加上有好多錢要放喺推廣。」

設計制服 搵第一桶金

Grace直言旗袍設計是冷門行業，除寥寥無幾的大品牌外，要買旗袍就要「捐窿捐罅」找師傅度身訂造，但她相信旗袍在現今社會仍有市場及支持度，更重要是它代表着中國傳統文化，她坦言：「我有句座右銘係You never try，you never know，未試過又點知唔得？」Grace於2012年推出首個系列，當時只做了十多款，屬實驗性質，最初只放在社交平台售賣，沒想到竟賺到一筆資金：「有個多年冇見嘅朋友透過facebook搵我，佢話佢公司旗下一間五星級酒店就快開幕，覺得我設計嘅衫好啱佢哋形象，想我設計制服，做成咗第一單生意。」Grace坦言該次合作成為一支強心針，令她在旗袍設計師這條路愈走愈穩。

Grace對旗袍情有獨鍾，望將這優雅傳統薪火相傳。	Grace的設計深受圈中人愛戴，朱慧敏（右）亦是捧場客之一。	十多年未有行騷的蔣怡（右）早前為Grace出山。

改良革新 融合幾何風

Grace為了讓年輕一輩認識旗袍，在傳統基礎下大刀闊斧的改良令旗袍更現代化及日常化：「我將中式鈕扣改為啪鈕或者拉鏈，方便穿着，傳統旗袍嘅圖案一般都係中式花卉、龍、鳳，鑲晒金線刺繡，我就改用幾何、西式抽象花紋去代替，成個感覺年輕啲。」早前Grace舉行品牌首個時裝騷，不少藝人包括朱慧敏、吳綺莉、黎燕珊、陸詩韻等也有撐場，連十多年未有行騷的名模蔣怡也甘願為她出山。

Profile

．蔡毅明出生於上海，在香港長大。

．憑高挑身形及東方面孔成為模特兒，曾為多個國際品牌行騷。

．於2004年成立時裝表演製作公司，近年才逐漸退出模界。

．2011年推出自家旗袍品牌Yi-ming，首個系列推出後大受好評，獲酒店邀請設計員工制服。

．被設計雜誌選為40 UNDER 40傑出時裝設計師之一。

文：名人組