佘詩曼迷上捉精靈 捕得3隻

佘詩曼、周志康及安俊豪昨日到屯門出席「V city 3歲"DUCK"意派對」，與新鴻基地產代理執行董事黃振華先生、新鴻基地產代理租務副總經理孫雅茵小姐，一起慶祝V city 3歲生日，阿佘更即場替生日蛋糕噴上忌廉送上驚喜。

對電影票房冇壓力

阿佘透露近日迷上大熱的手機遊戲《Pokémon GO》，她說：「之前喺內地工作，返嚟香港到依家只捉到3隻，有次趁塞車捉到一隻，其餘時間困喺酒店冇得捉，聽日出發返內地宣傳電影《使徒行者》，會提早半個鐘出機場捉精靈。（有留意陳浩民唱嘅主題曲？）係咩？唔知呀！真係唔知。（有時間會睇吓？）都會嘅。」又透露出席活動前為謝賢慶祝生日：「今日《賭城群英會》最後一日戲，嚟呢度之前，買咗個蛋糕祝佢生日快樂！（《寒戰2》奪香港華語片票房第一，新戲有冇壓力？）我都有睇《寒戰2》，為我哋香港電影爭光係好事，我就盡力而為，唔會有壓力，演員嘅職責係盡力拍好部戲，其他留待觀眾評論。」

放大圖片	阿佘與Fans玩遊戲，又大唔透偷食忌廉。	歌手安俊豪與周志康（左一、二），以及新鴻基地產代理執行董事黃振華先生（左四起）、佘詩曼及新鴻基地產代理租務副總經理孫雅茵小姐齊撐V city活動。

安俊豪睇到痰上頸

另外，安俊豪獻唱兩首歌替V city賀壽，期間痰上頸，他說：「啱啱病好，都擔心演唱時會唔會有痰，點知真係有，希望快啲好番。（見到佘詩曼起痰？）都係，仲有同場隻卡通鴨仔，因為以前女朋友好鍾意。遲吓我可能去韓國參加選秀節目，我喺韓國學過韓文同化妝。（點睇吳彥祖話韓男化妝『男人唔似男人』？）我想識多啲幕後嘢，一來可以更加體諒他人，二來需要起上嚟可以自己搞掂，唔使靠人！」

文：影視組