美國麻煩女星蘭茜露漢（Lindsay Lohan）日前與未婚夫俄羅斯企業家Egor Tarabasov在倫敦住所吵大鑊，蘭茜事後更在社交網洗版批評Egor搭上其好友！鬧到咁大鑊，分分鐘結唔成婚！
30歲的蘭茜自去年底與23歲俄羅斯小富豪Egor拍拖後一直形影不離，兩人經常到處遊山玩水，今年4月男方更突然求婚！在倫敦一間房地產公司任職總監的Egor身家估計高達250萬美元（約1,950萬港元），兼且有個「富爸爸」。當大家以為情路上屢遇波折的蘭茜終於修成正果之際，日前卻驚爆兩人在倫敦肯辛頓住所吵大鑊！
事發於英國時間上周六早上5時，蘭茜與未婚夫Egor在住所露台大吵，嘈醒晒隔籬鄰舍，有住在對面的鄰居即時拍低整個過程，片段中蘭茜以招牌「豆沙喉」大叫自己名字及地址，爆粗說：「佢啱啱想捏死我，幾乎殺死我！你離開我間屋！夠膽就嚟多次！你真係黐X線，你個變態X，滾蛋！我唔再愛你喇！你一直以嚟都試過捏我幾次，你唔可以不停捏同虐打一個女人仲覺得冇嘢，好多人都睇到你掂我！已經拍低咗！滾！」約10分鐘後，警察到場破門入屋，不過蘭茜與Egor已離開，無拘捕任何人。事後警方稱已聯絡屋主，各人無恙。
事發翌日晚上，蘭茜在社交網上載幾段友人拍下Egor在夜店狂歡的片段，批評他講大話指自己身處另一地方，並無厘頭多謝他唔返屋企。之後又上載未婚夫被畫花的合照，並留言：「名氣改變人。我諗在我23歲時都係咁，糟透的日子，將於26或27歲改變。」似暗寸未婚夫唔生性！蘭茜又在社交網爆料指Egor正與一名時裝設計師Dasha Pashevkina一起蒲，蘭茜除了批評Dasha為「俄羅斯妓女」，更公開Dasha的住址及電郵地址。據知Dasha原來是蘭茜的老朋友，Dasha的社交網上有不少兩人合照。
蘭茜留言指未婚夫偷食後，不少網友留言安慰她，更有網友指她比「俄羅斯妓女」索好多！之後蘭茜再「發功」上載2009年主演電影《Labour Pains》的大肚劇照，並自稱懷孕，不知孰真孰假！至於Egor則被指玩失蹤沒有回覆任何聯絡。
文：外娛組