陳展鵬瞞家人送甩骹狗入院
無綫藝人陳展鵬前晚出席新劇煞科宴時遲到，原來是因愛犬發生意外，愛心爆棚的他決定先送愛犬入院，但他笑言要瞞住家人：「驚佢哋以為係我整到隻狗咁呀！」
陳展鵬、林夏薇及傅嘉莉（Kelly）等前晚到黃長興的西式海鮮店出席新劇《乘勝狙擊》煞科宴，姍姍來遲的展鵬表示家中愛犬發生意外，要送牠入院才遲到，他憂心地說：「佢甩咗骹，初初以為佢拉傷，啱啱帶佢睇醫生，屋企人去晒旅行，又唔可以畀佢哋知，驚佢哋以為係我整到隻狗咁呀！」
Kelly打到手痛
前晚由主角展鵬請食飯，他指拍劇時其他演員與監製已輪流「萬歲」，笑言當時忙於拍劇未有空，故現在才「找數」，並指要灌醉長興希望「收平啲」。展鵬又透露下月考電單車牌：「想考好耐，一直冇時間，始終拍劇自己揸會好啲。」並指已獲贊助學車。
Kelly表示劇中有不少喊戲，故一直要保持情緒低落，又爆料指劇中有三場狂摑陳山聰的戲份，至少摑了他共十五巴：「三場戲，每場戲起碼摑咗五巴！想借位，但有啲正面鏡頭真係要摑落去，山聰叫我真摑，起碼唔使被人摑咁多巴，摑到佢塊面有指印，自己隻手都痛！」講到再被指搭上有米人夫，她說：「有登到啲對話，但張相同人名根本就唔係我。」並指清者自清，笑言要將嬲怒的情緒發洩在戲中。
文：影視組