陳婉衡捉精靈撞電燈柱

《Pokémon GO》進軍香港，圈中潮人為之瘋狂！無綫咪神陳婉衡（Alycia）自爆瘀事：「我行落街玩，太投入捉精靈，撞咗埋去支電燈柱度！之後就要過馬路，我即刻醒覺，唔好玩遊戲住。」張秀文則表示兩星期前已下載試玩版：「我坐車玩，捉捉吓隻精靈去咗後面，我就成個人擰轉身，搞到周圍嘅人都唔知我做咩。」

林盛斌（Bob）與張致恒到雲南拍攝節目，回程返港時，後者「驚聞」該遊戲已上架，即發起與台前幕後齊齊下載相關程式。Bob搞笑說：「我畀張致恒導咗入局，佢喺車度興奮到好似黐咗線咁！做得呢行梗要緊貼潮流，聽講電視城可以捉到好多隻，所以嚟緊我冇事都會多啲返去。不過奉勸大家一句，千祈唔好玩物喪志！」

李彩華：個感覺好得意！

另外，昨日一早藝人李彩華已在社交網分享下載《Pokémon GO》的心得，她向本報表示一起身便下載，但可能因太多人同一時間下載，以致「塞車」未能成功，要花上一段時間：「之前睇新聞都見到呢個遊戲喺外國好受歡迎，一直等程式喺香港登陸去玩，今日終於等到啦！今日一落街，已經見到好多人拎住手機玩緊，個感覺好得意。」對於外國不少「玩家」玩得過分投入而發生意外，她表示有聽聞過，坦言自己是「安全玩家」：「如果喺街度玩得太過投入都會有危險，我當然會好小心，過馬路、揸車呢啲時間一定唔會玩，希望大家玩得開心又放心！」

蘇麗珊精靈改名游學修

而藝人蘇麗珊表示因工作關係，未能第一時間落街捉精靈，但有在拍攝的Studio使用道具吸引附近的精靈到來：「我捉咗幾隻霹靂蛋咋，不過見啲霹靂蛋樣衰衰咁，就改咗游學修（男友）個名，我嚟緊嘅方向係試圖將啲精靈改晒我朋友、同事嘅全名。」笑言將朋友變成自己的「寵物小精靈」，並表示在街上望着電話捉精靈較危險，大家要注意安全，又謂遊戲的好處是讓人在酷熱天氣下仍有動力落街捉精靈，多做運動。另外，「宅男女神」陳瀅表示早前在溫哥華度假時已率先試玩遊戲，透露自己是比卡超粉絲，還神秘稱捉比卡超是有秘訣及大派貼士：「一開始就千祈唔好揀頭三隻精靈，大家試吓點攞啦！」

文：影視組