薰妮發老脾叫停音樂
「詞壇聖手」盧國沾的兩場作品展演唱會圓滿結束，壓軸嘉賓薰妮因不夠時間讓她與粉絲傾偈，一度在舞台上發老脾叫停音樂，發一輪牢騷。
「詞壇聖手」盧國沾（沾Sir）一連兩場《歌詞大師盧國沾作品演唱會》前晚圓滿落幕，壓軸登場的薰妮獻唱最後一首歌《每當變幻時》時，突然叫停音樂，帶點不滿地說：「音樂可唔可以停一停，我要爭取，冇時間畀我同歌迷傾偈，係咁喺我耳仔講要起音樂，令我好亂。」受紅斑狼瘡困擾的她發老脾說：「前面可以控制得好少少嘛，我想講我今年登陸（60歲）喇！」兩晚演唱會因唱到超時，主辦商新娛國際負責人丘亞葵（Vigo）坦言合共罰了一萬六千多元。
慶功宴上，薰妮解釋：「第一場都係唔夠時間畀我講嘢，令我講得好趕，所以今晚一定要爭取，因為有朋友同歌迷嚟睇。（你係咪不滿？）冇，我係明白嘅，咁多歌手時間上係難控制，我已經縮咗一半冇講，唔緊要啦，將來大把時間講。」Vigo昨日在電話中坦言：「薰妮係有少少不滿，不過小事一樁，佢有同我講咁多年冇企上台，想講幾句，唔知點解音樂咁快起，我支持佢嘅，因為排Rundown時都預咗過鐘，所以冇問題。」
沾Sir送特製紀念杯
而沾Sir為答謝一眾演出歌手，特別送上刻有其歌曲歌詞的杯送給眾人，羅嘉良說：「好多謝丘亞葵撮合呢件事，真係冇盧生唔會有羅嘉良，世界真係好奧妙，過咗二、三十年再見面，感覺好開心、好正。」忙於為無綫拍網劇《無間道》的他透露妻女日前來港探班。而一班後輩歌手許廷鏗、胡鴻鈞與鄭俊弘在騷上分別獻唱關正傑的歌曲，三人異口同聲表示感壓力，幸觀眾反應熱烈。此外，談到關心妍前晚誕女，許廷鏗說：「恭喜佢，等佢調理好就去探BB。」
文：音樂組
