李成敏打爛花瓶 空虛等人錫
「全世界第二美女」韓星李成敏（Clara），擁有天使面孔及魔鬼身材，但她不甘被定型為「花瓶」，為了演好電影角色，走去學騎術及訓練身手，目標是做「打女」殺入荷里活。在工作全力搏殺的同時，她亦懷着一顆恨拍拖的心，望早日遇上愛錫她的真命天子。
最鍾意長頸
Clara獲選「全世界第二美女」，被公認是大美人，她對自己的要求也非常高，為保持Fit爆身材，她努力勤做瑜伽及跑步，絕不怠慢。
「當我知道自己被選為全世界第二美女，真係覺得好驚喜同好榮幸，第一時間係想同父母講呢一個喜訊。其實我都唔知自己點解會當選，如果你問我最鍾意自己身體邊個部位，我會話係條頸，因為條頸好長，令個人睇起嚟好似好高。因為如果條頸短，即使個人好瘦，睇起嚟都會好矮咁。而我最唔滿意嘅部位係我對腳，因為覺得唔夠幼，我想對腳再瘦啲。
「為咗令對腳瘦啲，我有跑多啲步，同埋最近我迷上咗做空中瑜伽，除咗可以令身體更加柔軟之外，又可以建立到身體嘅肌肉，令到線條更加靚，真係一項好好嘅運動。」
獲古仔幫助
參與電影《使徒行者》的Clara，大讚藝人佘詩曼及古天樂很友善。而她將參與另一部內地電影，為了演出而學騎術，誓做到內外兼備，不甘被視為花瓶。
「佘詩曼係一個好Sweet嘅女仔，對我好好，成日都幫我，又會幫我手翻譯。我哋私底下好好朋友，令到我即使人在異鄉，都唔會覺得好孤單。古天樂係一個好出色嘅演員，我同佢有一場對手戲，係話我要殺佢，有好多動作。佢好清楚每一個打鬥流程，一路帶領住我打，真係幫咗我好多，不過我哋拍完戲之後就冇乜聯絡。
「嚟緊我會去內地拍電影，戲裏面做名模。因為戲裏有騎馬戲份，所以我依家學緊騎馬。原來騎馬冇想像中咁危險，隻馬好溫馴，所以都唔驚會受傷。同埋我係以做打女為目標，對自己嘅身手都有信心。雖然好多人對我嘅印象都係性感，我覺得健康性感OK，不過希望大家記得我係一個出色嘅演員，唔係只係花瓶。」
冇男仔追求
工作忙得不可開交的Clara，不時穿梭內地及韓國，並坦言目標是進軍荷里活。雖然她事業心重，但她亦揚言恨拍拖，望找到一個愛她的男人。
「近年我放多咗時間喺香港、內地工作，我之前喺深圳拍咗兩個月戲，真係好掛住媽咪煮嘅食物，同埋好掛住自己張床，所以一拍完戲返到屋企，就攤喺床上面乜都唔做。其實我希望可以韓國同外地嘅市場都兼顧到，最好五十五十，雖然成日舟車勞頓都辛苦，不過係值得嘅，我目標係打入荷里活！
「雖然依家係事業搏殺期，不過我都好想拍拖，真係完全冇男仔追求我，我都唔知點解。其實我嘅擇偶條件好簡單，我唔介意國籍，亦唔介意對方有冇錢，最緊要愛我。我想要個好Sweet嘅男友，會成日搵我。」
紋身圖案 創作靈感
Clara修讀時裝設計出身，對「美」相當有要求，早前她與「港產陀飛輪」萬希泉合作，以設計師身份創作陀飛輪腕錶，正式「升呢」為設計師，她坦言夢想成真。她說：「我特登用咗自己嘅紋身做錶嘅圖案，因為個紋身對我意義好大，有機會嘅話，我想繼續推出一系列自己設計嘅錶。」
服裝：methodology
場地：Hotel sav