吳婉芳爆肌二仔唔恨做明星
「凍齡美女」吳婉芳三子女都出色過人，可謂筍盤中的筍盤，就讀倫敦大學的大仔Caspar今年以一級榮譽生大學畢業，將向碩士生進發；而就讀牛津大學的二仔Lynus，讀得又玩得，鍾意健身的他練得一副好Body，毫不吝嗇在社交網站晒六舊腹肌。
48歲「三料」前港姐吳婉芳（May），下嫁商人胡家驊後育有三子女，婚後專心相夫教子，三子女遺傳媽咪的美麗基因，論樣貌已贏在起跑線，在她教育下，仔女學業成績彪炳，三人均就讀著名大學，大仔Caspar今年剛畢業，日前二仔Lynus在社交網站上載了一張與哥哥Caspar的合照，更留言恭喜穿上畢業袍的哥哥：「特別為你驕傲！」此外，Lynus又上載了一張疑似參加健美比賽的相片，大晒「朱古力肌」，身材無懈可擊，正到爆！
兩子允文允武
Caspar就讀倫敦大學經濟系，成績一直名列前茅，今年剛以一級榮譽生畢業，記者致電May，她說：「大仔會繼續讀碩士學位。（讀完會否接手家族生意？）未知，佢哋自己鍾意，我畀好大自由度佢哋。（大仔是否較靜，二仔較好動？）都唔係，兩個都好鍾意運動，阿哥鍾意游水，細佬鍾意健身、踢足球。（二仔晒爆肌相，佢參加健身比賽？）唔係，佢玩吓啫，佢鍾意做Gym。」
細女入「倫大」
Lynus有樣有身材，May笑言自從上次在馬場曝光後，有不少人邀請他拍廣告：「仲有人叫佢參加大隻佬比賽，但佢冇理到。（唔想佢入娛樂圈？）唔係我贊唔贊成，我諗佢哋都唔會考慮入呢行。」至於細女Helene同樣叻女，9月將會入讀倫敦大學，May亦將會有一半時間留在英國陪仔女。
文：名人組