崔碧珈封胸讓賽 莊端兒女神搞曖昧
昨日書展寫真戰繼續「群雌亂舞」，G Cup女星崔碧珈封胸讓賽，聲稱冇契爺掃書，35E莊端兒化身希臘女神搞簽名會，提到離合多次的張致恒即口窒窒，至於梁晶晶則騎呢「執書」晒胸，並寸爆有人篤數！
多位今年有推出寫真的女星及模特兒昨日到書展谷書，擁有36G豐滿上圍的崔碧珈（Anita）穿斜膊衫只露線頭，封胸讓賽，她坦言不知寫真銷量如何，但有幾位朋友支持，相信「起碼有幾本」，並笑言沒有契爺包幾千本書：「我啲朋友最多買十本、廿本咋，冇咁好彩有契爺。（冇識到老闆？）冇呀，點識呀？（有冇人問價？）冇喎！可能我太高大，佢哋唔係好啱。」講到她與二妹合照甫上網後，網友大讚姊妹都很索，Anita說：「佢係索o架！（身材呢？）唔錯嘅。（帶佢入行？）佢係精神科護士，就嚟結婚喇！」
懶理被寸篤數
前晚以火辣低胸裙出席首映的莊端兒（Xenia），昨日化身希臘女神出席簽名會大騷E Cup身材，獲好友及約三十名Fans撐場，她透露寫真銷情不俗，初版五千本後要再加印五千本，對於被o靚模梁晶晶寸爆篤數，Xenia說：「唔係已經冇o靚模喇咩？其實呢個係我收到嘅消息，唔係我發放。」講到感情事，她即吞吞吐吐，被問到跟張致恒（Steven）是否已復合？她說：「唔答得唔得？好難公開咁講！（佢仲係你男友？）唔回應喇！（你哋幾耐冇見？）都好耐，成個月。」對於Steven公開刻有「愛你一萬年」的戒指，Xenia稱不知情：「唔知係咪畀我喎！（送畀你嘅訂婚戒指？）女仔對求婚好重視，要有晚餐、一紮花、戒指，依家梗係唔應承，唔夠誠意。」
抽獎送露點相
「台灣乳神」張永歆穿低胸裝到攤位谷書，她直言出寫真後在港知名度增加，對於有指其寫真明顯執相，她直認有「加工」：「基本上有修一點，大家都喜歡看漂亮的東西呀！但看動態片就知道我真人如何。」至於梁晶晶身穿背心宣傳寫真時不慎跌書，俯身執書騷事業線，其後再多次「不小心」跌書引人影！她稱懷疑其他對手報大銷量：「個個下下話賣幾千本，我好老實，第一日賣百幾本，係真係假遲啲發行商會出report，如果講內部認購，有人話幫我買過億添啦！」她又透露或會「抽獎」，將拍攝時的走光露點相送給幸運Fans。
文：影視組