黎明開騷變魔術玩拉布

天王黎明（Leon）早前在中環海濱開騷反應熱烈，昨晚他移師澳門新濠影滙綜藝館，舉行一連兩場的《黎明Leon Random Love Songs Live in Studio City 2016》！開騷前的傍晚時分，四位幸運兒率先見Leon，戴黑超的他與三女一男幸運兒挑戰全球唯一的8字形摩天輪「影滙之星」。共聚12分鐘「幸福摩天輪」期間，Leon跟幸運兒言談甚歡，不但跟他們逐一握手，又搭着他們膊頭影相，十分親民！

四位忠實粉絲分別來自香港、澳門與內地，透露在摩天輪上與Leon暢談畏高話題：「Leon話因為工作試過玩跳樓機同笨豬跳，佢話都幾驚，但為工作突破自己，幾困難都做到，好勇敢！」唯一一位男粉絲則笑言掛住望Leon，腦海一片空白，問到可有單獨跟Leon影相？四人透露有一齊大合照：「珍惜同佢傾偈嘅時間，影相冇咁矜貴。（Leon有冇講金句？）冇金句，冇銀句，都係平時講嘅嘢。」

放大圖片	黎明與粉絲有傾有講，還搭膊自拍。	放大圖片

相隔兩個多小時後，演唱會正式於8時半開始，千呼萬喚的Leon終於出場！今次演唱會大玩派對主題，全新打造三面台，獲不少名人到場支持，包括葉澍堃等。個唱流程大致跟港騷一樣，Leon先在台邊現身，向觀眾表示經過一個階段才會有新階段，並祝大家暑假愉快，他笑說：「其實除咗演唱會，有機會都應該要學一學魔術。」隨即化身「魔術師」，一手把左邊棍上的黑布拉走！

黎明於新濠影滙開騷，點少得晒金句！	黎明變「魔術」隨手將黑布拉走……天王即係天王！	黎明

男歌迷當眾示愛

其後，換上型仔西裝的Leon連唱幾首歌後終於爆金句：「唉！今日係有冷氣嘅，但我唔在意有冷氣定冇冷氣，有時在意就會冇咗，唔在意就會有番！」唱到《送你一瓣的雪花》時，現場亦有如港騷般飄下雪花。唱到《我愛Ichiban》時，全場歌迷High爆，有男歌迷更向Leon示愛。

黎明	直播時，酒店內都可以睇到黎明獻唱。

尾聲時，Leon跟觀眾說：「暑假到咗，知道好多人出咗嚟做嘢，亦有好多人考完試出嚟，佢哋係社會下一世代、向前衝嘅年輕人，一分鐘輸贏可能好重要，但唔好氣餒，因為我都係冇氣餒咁行過嚟。」全場掌聲雷動！最後他以《夏日傾情》作結。

出動航拍 360度直播

繼香港騷中進行facebook直播後，Leon今次應大會要求再玩直播獻唱一曲，還首次採用360度航拍技術。除了在Facebook睇到直播外，酒店同時安排一樓、食街與酒店外的大電視直播Leon的表演，吸引不少旅客圍觀。直播開始時，Leon指今次第一次做航拍Live，叫大家不用擔心：「唔會喺你哋嘅頭上面經過，如果（航拍機）失控嘅話，會懸掛空中十分鐘先跌落嚟！」當Leon獻唱《情》至中段，航拍機在其頭上盤旋，他不時對鏡頭揮手及微笑。

另外，有不少未能親身睇騷的粉絲紛紛留言，有人讚他「咁體貼嘅男人邊度搵！」直至昨晚11時有近33,000瀏覽次數。

文：音樂組

攝：鄭家俊、黎志輝