藝人睇完個個讚丁子高期待更震撼視效
黎明的演唱會由三位著名音樂人包括雷頌德（Mark Lui）、伍樂城和C.Y.Kong組成創作團隊統籌音樂部分，作為Leon個唱音樂顧問的Mark Lui，覺得演唱會難度最高的地方，就是將觀眾最喜歡的原裝版本配上新穎的聲效，他說：「黎生好清楚大家想聽番以前原本嗰首歌嘅感覺，但係聲音、效果又要新穎，所以我同伍樂城、C.Y.Kong悉心幫佢做編曲，係嘥好多心機去編排啲歌，加上環迴立體聲效果，出嚟又不失觀眾以前聽慣嗰個味道。（比起過往Leon演唱會花心思？）黎生做嘢唔會唔花心思，佢要求咁高，只不過每次要求嘅嘢唔同。」
曾經是黎明旗下歌手的應昌佑對Leon 4月時的演唱會極為讚賞，他說：「佢之前經過咁多波折開騷，雖然有美中不足地方，但希望佢喺澳門開騷時做得更好，唔好嘥咗佢個概念，我覺得Leon成個演唱會都好好睇，因為真係集體回憶，我同大家一樣好鍾意佢唱舊歌，佢平時開演唱會好少跳，睇得出佢今次喺舞蹈方面落咗好多苦工，衣着又有心思，Leon仲好聰明將成個騷變得open，讓核心外圍朋友都聽到佢嘅歌聲，非常成功，贏得一致好評。」曾獲Leon一手栽培的JW對演唱會記憶猶新，因為第一場臨時取消，結果造就她翌日入場變成睇頭場騷，她說：「好正，係一個good show！有機會都想再睇。」
作為黎明粉絲的丁子高大讚上次香港騷opening好正，相信今次Leon在新濠影滙開騷，視覺效覺會更加震撼，他說：「黎明啲歌基本上我都識晒，好有集體回憶感覺，非常投入跟住佢唱，Leon好有壓台感，啲衫又靚，佢唔使點跳，佢嘅台風已經畀你大騷感覺，加上黎明喺dancers選角方面好好，一班火辣美女演出相當精彩。」而演員游學修睇過黎明上次演唱會，最鍾意黎明的快歌：「就算佢企喺度唱快歌都冇問題，因為佢係黎明，最期待黎明喺新濠影滙演唱會希望會再做facebook live，因為佢係藝人當中做live做得最好，如果佢再做我一定會黐實捧場。」