梁裕恆辭職消防選港男

入圍香港先生的四大熱門要數「露股男」梁裕恆、「王浩信細佬」王瑋彤、「翻版古天樂」黎振燁及前晚才突然「復活」的「羅天宇細佬」胡(非玉)。不過，王瑋彤的身體認真麻麻，繼面試階段因腎石入院後，昨日再次面青口唇白一副病容見人，余詠珊透露有參賽者因壓力大而患病，原來正是王瑋彤，他氣弱柔絲地說：「係呀，呢幾日都要綵排，依家都發燒。（係咪腎石影響？）唔係，係呢幾日太緊張，令到個人好易攰，唔夠休息。（頂唔順？） OK嘅，係自己緊張，瞓唔到又食唔到。（有咩咁緊張？）自己好容易緊張。（會否請病假？）如果真係好唔舒服都會請一兩日病假。（考慮退選？）唔會。」

吸引男士示愛

王瑋彤帶病參選，任職消防員的梁裕恆去得更盡，他透露已經辭去消防員工作：「簽名嗰陣都有啲猶豫，始終自己都做咗五年零兩個月消防員，有啲同事都叫我考慮清楚，但都諗住一心一意喺娛樂圈發展。（好有信心？）就算選到都未必係星光大道，自己唔係要做明星，亦都冇發明星夢。（參選後社交網站多咗人關注？）會呀，男女都有。（有男仔同你示愛？）有，但會話畀佢聽我唔係。（話你係溝女王，驚影響形象？）總有人會話好同埋唔好。（依家有冇拍拖？）四年冇拍拖。」

王瑋彤稱緊張搞到發燒，但不會考慮退選。

陳庭欣率先親近十四位入圍香港先生。

胡(非玉)解約翻生

前晚在節目《萬千星輝放暑假》突然「復活」入圍的胡(非玉)解釋：「自己一直收唔到電話，以為入唔到圍，大概五日前收到TVB嘅電話，話舞台劇合約有問題，後來我同舞台劇解除咗合約就可參加。（賠錢？）唔使。（哥哥有冇貼士？）叫我唔好咁緊張，我同佢都係好怕醜。」

大會統籌經理余詠珊解釋胡(非玉)「復活」之謎，她說：「之前揀咗佢入圍，但佢同舞台劇有合約，後來佢解決咗合約問題，就可以繼續參加。（賽制係點？ ）未決定淘汰幾多個，好似尋日有啲男仔因壓力太大而病咗，要睇進度先決定淘汰幾多人。（係咪真係冇泳褲？）我希望冇，因為今年啲男仔質素幾好，今年希望幫TVB搵到一啲重要嘅藝人，冇泳褲可能會少咗啲瘋狂尖叫聲，但我哋都會騷佢哋啲肌肉、42吋胸肌。」

文：影視組