利嘉兒鍾情電動車老公送夠3架揼本改裝
利嘉兒六年前下嫁做製衣及門鎖生意的有米商人Bong，揸名車住豪宅，老公是愛車之人，近期更豪花百萬元買了一架環保電動車送給老婆。利嘉兒大讚性能好，慳錢又環保，但覺外形太大，老公聞言即再預訂兩架較細的新款電動車，出手闊綽。
當年主持《笑談普通話》彈出的利嘉兒（Lily）一向着重環保，只要是能力範圍內都會做：「開少啲冷氣同燈，而車對地球環境破壞影響好大，從車着手都係好事。」談起車，她滔滔不絕，全因老公是愛車之人，薰陶她對車亦有研究，她更以女人愛換手袋、換新鞋，來形容老公對車的熱愛程度。
早前她以110萬元購入近年流行潮物Tesla Model S電動車，她說：「市場有咩新款老公就會八卦，身邊朋友大讚架車好，所以就買咗，揸咗之後，比預期優點多好多，電動車係大趨勢，既環保又In，起步嘅爆發力好勁，媲美好多超級跑車，好快、有貼背嘅感覺。」身為DJ，她與音樂不能分割，座駕最令她滿意的就是音樂：「架車本身內置儲存咗好多歌，歐美中日韓任何類型都有，仔細分類好，好正。而且個Mon好似iPad咁大，GPS好準，睇導航好清楚。」
自設電動車叉電器
既是環保車，不需要入油，當然慳番唔少，她說：「架車平時老公揸多，以前佢每個月八、九千油錢，依家佢喺公司安咗個叉電器，每月電費都係六、七百蚊，慳咗九成幾。（叉電會否麻煩？）如果自己冇安裝叉電器，平時要去有叉電嘅停車場，就要排隊，唔係好多停車場有，因為仲新，希望嚟緊會有多啲地方可以叉。」
Lily續讚座駕有人工智能，跟車太貼會有提示，又有行車記錄：「架車會記憶你成日去嘅地方，如果經過啲路有Block位，車頭會自動升降避震，有晒感應，仲有一樣好處，就係自動駕駛，但香港唔用得，喺外國Highway用就會好正。」
新車落地唔使稅
不過，Lily認為此車美中不足是外形：「似房車又有啲似跑車，唔湯唔水，我哋想佢靚仔啲，將架車銀色嘅部分都轉晒黑色，有啲與眾不同，架車原價七十幾萬，因為加咗天窗，加大馬力同轉咗外形嘅色，所以要110萬。」她亦十分留意環保車的新動向，知道將推出車身較細的model 3，已急不及待落訂買兩架：「model 3好啱女仔揸，架車細啲，好靚，價錢比較平，暫時公布價係30萬，但未知要唔要稅，因為依家電動車至2017年都唔使稅，但架車要2018年先有貨到。」
文：名人組