王馨平 胡琳重溫集體回憶
著名填詞人向雪懷8月將舉行兩場作品演唱會，邀得30多位巨星歌手助陣，寫下無數金曲的他坦言個唱是寶麗金集體回憶，更點名王馨平獻唱鄧麗君的《東山飄雨西山晴》。擁有靚聲的馨平充滿自信，直認熟悉歌曲旋律，並說：「細個喺台灣成日聽。」
創作逾千首金曲的填詞人向雪懷將於8月12日至13日假紅館舉行兩場《2016香港夏日流行音樂會．向雪懷一生中最愛作品演唱會》，邀得當年合作無間的寶麗金歌手演出，包括譚詠麟、周慧敏、關淑怡、王馨平、黎瑞恩及湯寶如等，加上新一輩歌手胡琳、王梓軒、陳樂基及鄺祖德等，合共有30多位歌手參與，可謂星光熠熠！主角向雪懷日前偕王馨平及胡琳接受本報訪問。
3年前率先落Order
向雪懷透露會尊重參與演出的歌手：「唱咩歌交番畀歌手揀，每個人都有個人喜好，我會尊重大家。」他透露只有一首歌點名要馨平唱：「佢係第一個知道我搞演唱會嘅，三年前已經叫佢一定要幫手唱，就係鄧麗君嘅《東山飄雨西山晴》，佢係不二之選！」問到被點名的王馨平可會有壓力？她說：「呢首歌好熟，我喺台灣長大，細個喺台灣成日聽呢首歌嘅國語版，所以好熟悉旋律。」
難忘「寶麗金精神」
向雪懷承認去年已曾考慮辦作品展：「想搵時機，其實有幾個原因，第一係『寶麗金精神』，依家個圈仲講緊『寶麗金精神』，呢個Family感覺依家好似冇乜；第二係年紀大咗諗番以前啲嘢，如果鄧麗君、張國榮同陳百強大家仲企喺台上係開心事，人生無常，今次係寶麗金集體回憶。」他又不忘感激一眾參加演出的歌手：「個個都咁忙。（一呼百應？）可以咁講，今次好開心。」至於身為後輩的胡琳坦言對於獲邀感榮幸，並透露屆時會選唱偶像黎明的《那有一天不想你》。
文：音樂組
攝：劉智源