林小美被男主角撩入房

模特兒林小美（Cherry）不時拍網上短片，最近獲賞識擔演內地網絡電影《茉莉威龍》。演戲經驗不多的她自言感壓力，雖然事前已背熟劇本，但拍攝時仍有不少「蝦碌」場面：「開拍前幾日先獲通知，演戲時要用普通話，要重新背過劇本，好彩出嚟效果都OK，導演仲讚我講普通話唔錯。」隻身到內地拍攝多日的Cherry，大爆曾有「驚險記」：「試過有晚男主角問我有冇興趣去佢間房排戲，我當時好驚，仲打畀喺香港嘅經理人求救，事後先知原來係我誤會咗。因為當晚導演同編劇都在場，單純想我哋事前排戲令拍攝更順利，依家諗番都覺得好瘀。」