黃芷晴撳實心口飛奔後台抽Bra

藝人黃日華女兒黃芷晴昨日與歌手狄易達、組合Szster及藝人陳琪，出席Mikiki商場舉行的《妖怪手錶舞台劇：地縛喵的秘密－記者招待會》。眾人分別與卡通公仔影合照，穿上綁帶Tube Top襯短褲的芷晴，被點名跳舞台劇片尾曲《妖怪體操第一》，左扭右扭兼要舉高雙手，動作大搞到「上下失守」，胸圍移位兼露出底褲邊。為免醜態被攝入鏡，芷晴即雙手護胸並落台衝入休息室整理。

圈外男友呷乾醋

芷晴受訪時否認「失守」死撐說：「有着打底褲，上身因為跳舞搞到鬆咗少少，只係抽番上去，小問題啫。（去休息室抽Bra？）唔係，入去飲水。」甩拖九個月的她，又大方承認蜜運中：「拍咗個幾月，係圈外人，朋友介紹認識。（見過父母？）見過，每次拍拖都會帶畀家人見。」隨即踢爆男友呷乾醋：「有次我做訪問話有個圈外男友，佢就聽到我有個圈內男友，所以問我，大家講番冇事。（有冇錫啖呵番男友？）都有。」

甩拖的狄易達（左二）未有受分訊影響心情，更否認有第三者介入。

芷晴發現內衣移位即雙手護胸，急返入休息室整理。

達仔出口護前度

而早前承認與台灣女星吳亞馨分手的達仔，坦言心情OK，問到會否復合？他說：「唔知，呢個時間大家需要空間。（發現對方有另一半提出分手？）大家都冇第三者。（邊個提出分手？）好難答，唔講太多。」達仔否認受家人壓力，問到是否因女方的過去而分手？他說：「唔會啦，其實佢好好。」並透露月底將飛台灣。問到是否去箍煲？達仔大笑說：「唔係，做自己嘢。」

文、攝：音樂組