關禮傑大女等提名選美
藝人關禮傑與太太及幼女到英國出席大女關楓馨的大學畢業禮，21歲的楓馨樣靚學歷高，與15歲青春活潑的妹妹佩盈，旋即被《東網》逾萬網民爆Like，關禮傑也認同女兒有參選香港小姐資格！
關禮傑大女關楓馨在英國大學畢業，他與太太Anna及幼女佩盈特到英國出席畢業禮，並於網上貼出一家四口溫馨照片，《東網》網民除大讚三母女激似三姊妹外，對於楓馨、佩盈更踴躍畀Like！不足一天已過萬Like，更大讚戴四方帽、身穿學士袍的家姐楓馨樣靚學歷高，又讚染髮的妹妹佩盈夠Young。
分享凍齡心得
身在英國的關禮傑接受訪問時也大讚21歲的大女：「今次嚟英國參加楓馨嘅大學畢業禮，佢讀關於教育嘅科目，我哋會喺英國逗留多兩日，之後同老婆、兩個女一齊去意大利玩兩星期，難得細女都喺加拿大嗰邊過埋嚟，希望一家人去玩吓啦！（提名女兒選港姐？）參加港姐都係一種磨練，但佢想畢業後出去做吓嘢、見識吓先，睇出年佢條件仲適唔適合，仲有冇朋友想提名佢，到時睇佢意願啦！」
與女兒合照的關禮傑樣子仍很年輕，問到有何保養心得？他說：「男人唔係好識呢啲嘢，可能我負擔壓力少，因為啲女嘅教育問題唔使我負責，可能咁樣大家覺得我保養得好。」
文：影視組