楊愛瑾 傅穎前後腳巨鑽撼巨躉
人妻楊愛瑾（Miki）和藝人傅穎（Theresa）難得同場，惜無緣鬥搶鏡，惟有各自精彩，前者低胸晒巨鑽，Theresa就側身露Bra晒36吋pat pat，兩女還透露有機會結片緣，打破逾10年不和之說。
新婚的楊愛瑾昨日出席於apm舉行的「奧運珍藏展」活動，身穿紅色低胸裝晒微波的她，手上無名指的鑽戒閃閃發光，她透露剛和老公到希臘旅行曬得一身健康膚色，自言難得練成腹肌，不妨在社交網上載泳照晒成果，更爆老公自誇腹肌比她更勁。問到旅行中可有和老公造人？Miki笑說：「順其自然，唔諗咁多，聽人講諗太多反而冇。」有傳好友吳雨霏（Kary）懷孕？她說：「唔知喎。（Kary想生？）佢都隨緣，最緊要兩個人開心。（鬥快？）比賽？呢啲好難喎。」
兩個月前見面
提到前組合Cookies隊友傅穎於稍後時間在同一商場出席活動，Miki謂兩個月前曾見面，但昨日活動後已約人未能相見，不過可能合作電影。講到Theresa素顏拍片教化妝以證沒整容，Miki說：「咁正？我冇睇，但好大膽，我唔敢，除非執過，不過知佢化妝好叻，鍾意鑽研。」又指不覺Theresa「膠面」，且變得更成熟、更美。
其後，Theresa現身apm舉行的「apm夏日運動狂熱」開幕禮，同場有新鴻基發展（中國）董事馮秀炎等。談到Miki在之前的活動上稱有機會合作電影，Theresa表示在電影中或有一、兩場戲同場，問是否破冰？她說：「冇冰可破！」
做足安全措施
穿上背心及短褲的Theresa，側身時大露運動Bra，頻呼自己好大膽：「我肥咗好多都着成咁，個pat pat有36吋！（同拍拖開心有關？）唔關事，係鍾意食嘢又少咗運動，男友冇得介意，加上係家族遺傳。」被讚好生養時，Theresa則謂「得pat無所用」，因未婚又未生BB，更不會奉子成婚或閃婚，並指跟男友只拍了年半拖，問到男友身份？她說：「同呢個圈有關，但唔係藝人，亦唔係娛樂公司老闆，靚靚仔仔咁啦！」
問她可擔心意外懷孕，可有做足安全措施？Theresa尷尬說：「係呀……做足預防，結婚先，男友好傳統，況且好少見。（可擔心出現第三者？）冇得計，未到結婚都好多變數。」
文：音樂組
攝：林蔚恩