克勤恨C朗威番次 明燈小方點法國
歐國盃來到決勝時刻，周一凌晨由葡萄牙大戰法國爭冠軍！圈中一班球迷引頸以待，其中兩大球迷李克勤與方力申（小方）各有所好，克勤支持有C朗助陣的葡萄牙，「明燈」小方則力撐有主場之利的法國隊！
經歷足足一個月，足球界盛事「2016歐洲國家盃」將於本港時間周一凌晨3時上演萬眾期待的決賽，由葡萄牙鬥法國！冠軍之戰當然吸引一班圈中球迷捧場，其中李克勤、滕麗名、莊思敏與莊思明力撐葡萄牙，方力申則睇好有主場之利的法國！
忠實球迷的李克勤昨日受訪時客觀分析，指兩隊不算得上是今屆表現最好的兩支球隊，指葡萄牙陣中有不少出色球員如拿尼、C朗，法國則有腳風順的基沙文，保羅普巴與皮耶入波機會亦高：「所以我覺得呢場唔會係0比0嘅賽事！」
莊思敏姊妹撐葡萄牙
雖然法國有主場之利，但克勤坦言希望C朗可以攞一次大賽冠軍：「其實佢係好全面嘅球員，個人把握能力好強，無論頭球、射門、罰球、中距離定後腳等全部都有，所以先成為世界數一數二嘅球星。佢嘅大賽經驗亦非常豐富，估佢決賽會入波。」
至於一班女星包括滕麗名、莊思敏與莊思明兩姊妹亦力撐男神C朗，其中莊思敏昨日在活動上讚葡萄牙勝在有運：「由分組賽開始都係靠運仔過關出線，今次應該贏埋o架喇！」莊思明亦指身邊有很多葡國朋友，所以會撐葡萄牙：「C朗靚仔得嚟又有技術！」
單天保至尊Vs主場之利
至於「飛魚王子」方力申原來亦熱愛足球，電話中表示整體來說應該是法國睇高一線：「不過波係圓嘅，要睇吓球王C朗可唔可以『單天保至尊』！上場中堅比比冇踢到，唔知佢哋係咪想留力，如果佢踢嘅話防守就會好啲，所以都要拭目以待。」自嘲是明燈的他坦言會撐法國隊：「因為有主場之利，近幾場都贏得好有說服力，相反葡萄牙上場對威爾斯，對方有兩個主力停賽，影響好大！法國前鋒基沙文成日入波，入波最大機會都係佢。」
文：音樂組