李施嬅拍劇蝕底：我唔係唔憂做！

李施嬅在無綫劇集《純熟意外》中一人演繹三個不同角色，由事前準備角色到埋位拍攝，付出的好比拍攝了三套劇集。不過，一直默默耕耘的她，外間總是錯覺她唔憂做，欠缺了一點積極性。現時每年拍劇一套起兩套止的李施嬅說：「做演員好被動，我都想拍多啲，自己隨時候命，我入行咁耐都冇推過劇，相信公司有啱會搵我。其實杏兒都有同我講過，佢哋覺得我唔夠主動，我唔係唔憂做，可能我唔識講嘢，唔夠主動，但係呢個係我性格，同我合作過嘅監製都知我份人係點，我係唔識主動，可能我真係要改變吓！」

姊妹係競爭對手

李施嬅慶幸認識一班「胡說八道會」姊妹，大家互相推動，無所不談，她說：「大家同一間公司，某程度係競爭對手，但大家又冇互相競爭嘅心，反而大家都為對方設想。佢哋見到我好鍾意食嘢，成日會捉我去keep fit，但係我真係好鍾意食，唔食會變忟薑，但係都好羨慕佢哋嘅身形。」

李施嬅入得廚房，笑言以前的男朋友皆十分讚賞。

李施嬅（右三）有幸認識胡說八道會好姊妹，彼此無私互相推動。

樂做煮飯婆

講到食，李施嬅與吳啟華十分投契，啟華有時會親自煮幾味帶返工讓大家品嘗，問到會否特別欣賞會煮嘢食的男士？她說：「我自己都鍾意煮嘢食，對食有要求，鍾意煲湯、羊架、海南雞飯，自己覺得有住家飯食、有人等你食飯係好幸福！如果另一半識煮當然開心，但煮畀人食，見食嗰個幸福都開心，以前啲男友都覺我識煮嘢好緊要，覺得我好好嘅原因，哈哈！」

此外，李施嬅前晚到馬場撐馬主好友馬浚豪的「順勢寶」場，雖然高興拉頭馬，但買了80元獨贏的她卻「中空寶」，收錢時才發覺買錯場數，相當尷尬。她受訪時笑說：「我去到counter話買8號，但冇講邊一場，收錢時，佢話你冇贏喎！我話吓？點解呀？其實我唔識買馬，咁大個女都係第二次入馬場，不過算啦！但真係好(火羅)！」

文：影視組　

攝：劉智源