Super Girls濕身誘惑水戰玩出火

組合Super Girls昨日趁夏日炎炎到戶外場地水戰消暑,穿上比堅尼配白Tee的五女激戰十分鐘後,遭圍攻的Yanny與隊長Aka齊齊透出黑Bra及藍色比堅尼,大玩性感誘惑,Yanny更被隊友取笑冇身材,搞到嬲嬲豬的她發老脾呼喝:「你好多嘢睇呀?」今次認真玩出火。

組合Super Girls(SG)、歌手陳詩欣、模特兒鄧穎堯、余香凝及演員廖子妤等Jam Cast藝人昨日到中環海濱活動空間出席由Event Impact主辦的「Aape海賊王.夏日激航狂歡世界」,由於SG被安排落水戰場大戰,醒目的眾女齊以誘惑比堅尼打底,唯獨Yanny以黑Bra上陣,未有準備的Yanny更成為隊友目標,慘遭圍攻的她與隊長Aka同樣半身濕透,令黑Bra及藍色比堅尼若隱若現,相當誘惑。

知衰耍冧

被圍攻的Yanny投訴說:「今次真係患難見真情嘅反調,覺得好可憐,我冇準備完全濕身,但頑皮嘅隊友不停攞水槍射殺我。」好姊妹Jessica即食住個勢取笑其身材說:「我知佢唔想濕身,不過我哋係咁射到佢濕晒,最慘乜都冇得睇。」Yanny搶答:「好誘惑,好性感。」

抵死的Aka亦加入戰團稱好失望:「諗住射濕佢有嘢睇,點知……」此時,Yanny終按捺不住怒火,質問Aka:「Aka,你以為你好多嘢睇呀?」知衰的Aka即道歉兼補鑊說:「對唔住,Aka都冇嘢睇,佢都打晒底!」

激瀡滑梯

Aka大讚會場的遊戲好玩及刺激,她說:「條濕滑梯好刺激,感覺好似90度咁滑落去,好有離心力,幾得意同好好玩。」嘉年華為期一個月,入場費五十元,每位成人可帶兩名十二歲或以下小童免費入場,周一至周五的全日通為四百元,周六及周日則為五百元。開放時間方面,周一至周五為下午二時至晚上十時,周六及日則為上午十一時至晚上十時,當中設有四個競技大遊戲「路飛橡皮槍彈拳頭陣」、「索柏毛皮強化彈彈球」、「烏索普旋轉陷阱狙擊陣」及「芬奇超Super鐵人滑梯」。

文:音樂組