凱琳 嘉穎雪櫃紙仔傳情

藝人鄭嘉穎及陳瀅昨日於尖沙咀出席品牌活動,提到嘉穎日前與張栢芝亮相內地節目時,被公開家中雪櫃的外貌,當時栢芝更手持「道具」心形便利貼,讀出疑由嘉穎女友陳凱琳(Grace)寫的情話,對此嘉穎笑說:「我企到好遠影雪櫃相畀節目組,雪櫃張Note寫英文咁細粒,所以冇咩可能睇到內容,我諗佢哋係斷估。(女友喺雪櫃留言畀你?)係佢啲溫馨提示。」嘉穎又透露Grace會上門下廚:「佢多數煮西餐。(鍾意邊道菜?)樣樣都好!(佢上嚟煮定擺雪櫃?)可以咁講。」

而陳瀅透露月前於機場與人調換行李,最初以為行李鎖壞掉,請弟弟幫忙撬鎖,結果一開鎖就被「孖煙囪」嚇親,當時非常擔心私隱外洩:「因為我部電腦同相機都喺自己個喼,雖然冇咩核突相,但都好擔心,電腦仲有銀行密碼,好彩最後攞得番晒啲嘢。」