探訪貧民百感交集：有責任去幫人

徐子淇遠赴尼泊爾幫助災童，為慈善盡一分力。

子淇憶述一次到內地探訪「愛滋村」，感受非常深刻：「當地家庭好貧窮，環境惡劣到連電都冇，我探訪嘅家庭只有兩隻雞，生出來嘅雞蛋係唔食而要用嚟賣錢。我同佢哋食過一餐飯，佢哋雖然唔捨得食啲雞蛋，但都煮咗僅有嘅三隻雞蛋請我哋食，真係好感動，所以更加想盡能力去幫佢哋多！其實個媽媽有愛滋病，爸爸亦因為愛滋病已經去世，仲有兩個小朋友讀緊書，我哋智行基金開咗間餅舖，訓練佢哋學整餅做蛋糕，真係由細睇到佢哋大！佢哋好努力讀書，畢咗業喺餅舖度做，因為佢哋想賺錢幫番其他愛滋遺孤。」

兩個月前，子淇到訪尼泊爾地震災區同樣感觸良多，她說：「因為近機場嘅城市都仲算乾淨，但坐咗一個鐘車後，眼見到災難嘅破壞性係好大，有一間屋爛到係隨時會冧，但仍然有人住緊！我哋喺嗰邊起咗啲臨時學校，畀小朋友繼續返學，就算佢哋幾貧窮、環境幾惡劣，都仍然想返學同其他小朋友玩。」點點滴滴的真實個案，令子淇深深感受人們平日常忽略的「幸福」其實在身邊，故今次尼泊爾探訪特別帶同二女晞兒一起見證，長女晞彤因發燒不適而未能同行。

徐子淇面對一片廢墟，感觸良多。

徐子淇鍾情整蛋糕，還與子女親子樂。