馬蹄露晒31A性感冇底線
現年48歲的藝人馬蹄露將於年底推出寫真集，同時也於本月中舉行演唱會，馬蹄露昨日以露背Deep V騷31A iPad胸出席個唱記者會，身為好友的張慧儀與關寶慧等現身捧場。馬蹄露即場與姪仔馬米高合唱改編歌，激瘦的她解釋早前因鼻竇炎搞到喉嚨軟骨發炎，她說：「媽咪煮得好清淡，依家都有110磅。」
耗畢生積蓄
馬蹄露透露個唱投資了六位數，她說：「係我喺無綫畢生積蓄，都成六位數。（會性感演出？）一向都冇底線，睇吓有冇人肯幫我設計。（接受暴露啲？）可以。」隨即透露寫真不會趕及書展推出，她說：「十月去沙巴影，所以年底先會出。」
張慧儀及關寶慧齊聲表示戥好友開騷興奮，張慧儀說：「人應該多啲嘗試，至少佢畀我覺得有勇氣。」問到會否擔任馬蹄露的個唱嘉賓？兩人坦言怕上台，關寶慧自爆試過在台上表演時，因未能入Key搞到呆企，她說：「入嚟入去都入唔到，全程企喺度，幾核突。（淨袋歌酬？）影響聲譽。」
文：音樂組