唐詩詠撒嬌過火 嗲唔掂洪永城

藝人林文龍、宣萱、唐詩詠及高海寧等昨日在將軍澳出席無綫首部4K全實景拍攝劇集《不懂撒嬌的女人》記者會，其中唐詩詠在台上硬接拍檔王浩信趷籮嗲功：「我唔會偷食，我最鍾意食嘅就係你！」場面搞笑！

向台妹拜師進修

劇中與台灣女生作撒嬌對決的唐詩詠，被問到會否向男友洪永城撒嬌？她即大呻：「佢免疫，佢唔鍾意女仔撒嬌。（試過？）有時會有一兩句，太多就會叫我正常番啲，好奇怪！」又透露希望從台妹身上進修嗲功：「睇咗片，十個工作人員裏面有十個聽完都暈晒浪！」

王浩信趷籮賣萌，但唐詩詠依然嬲爆爆，令人期待兩人劇中發展！	放大圖片	林文龍和宣萱古靈精怪！

而離巢近八、九年的林文龍表示今次與合作無間的監製關樹明一同回歸無綫，而與高層杜之克洽談時，對方亦慷慨滿足其要求：「都係啲基本人道要求，有飯食有覺瞓，佢哋話會畀我哋好好休息。」又透露酬勞合理：「以往大家都覺得無綫嘅酬勞偏低，同市場價有距離。（比當年多好多？）幾倍！」

宣萱親熱戲喪笑

至於宣萱就指今次與相識廿年的林文龍首度正式合作，談到無綫首度以4K技術拍攝，她直言做「開荒牛」責任大，望藉此幫無綫踢走投訴，她又指是次回巢感受到無綫的誠意及尊重：「杜生（杜之克）直接聯絡我，用咗五分鐘就傾成！」又透露為保持最佳身形，已戒足三星期晚餐。談到與林文龍的親熱戲份，她笑言十分尷尬：「我一見到佢個樣就笑到收唔到聲！」另外，杜之克在台上透露劇集將於台南及上海取景，並會在翡翠台及網絡平台myTV SUPER同步播放。

文：影視組