陳婉衡餓住搶鏡 崔碧珈扯衫反擊
擁有36G「導彈胸」的崔碧珈（Anita）與36E「無綫咪神」陳婉衡（Alycia）昨日出席商場泳衣騷活動，先後換上兩套火辣比堅尼，Big爆上圍搶盡風頭，Anita更以一招兩男扯開上衣為泳衣騷揭開序幕，隨即令同場的陳潔玲（Christy）及張沛樂（沙律）被比下去，眾女為騷弗爆身形做足準備，貴為健身教練的Anita日日做Gym狂操線條，Alycia則化身兔仔僅吃沙律菜充飢。
「導彈胸」崔碧珈、「無綫咪神」陳婉衡、陳潔玲及張沛樂昨日於荃灣出席《一田夏日水著SHOW》，眾女分別換上兩套泳裝，Anita與Alycia兩位有料之人盡騷天賦本錢，E Cup的Alycia越級挑戰大兩Cup的Anita，論身形，弗到漏又有馬甲線的Alycia簡直冇得輸，反觀Anita以G奶兼出場時一招男舞蹈員扯開其上衣令現場起哄，結果兩個回合過後打成平手。對於扯衫環節，Anita笑指綵排時也有擔心：「驚被扯時扯唔到，又怕扯多咗！」
加入寫真戰
談到與Alycia上圍勁搶風頭，Anita謙稱：「今日個個都咁勁，我好羨慕其他人身材，都想自己瘦啲，會繼續努力，唔只要減磅數，線條好緊要。」已考獲健身教練牌的她更指早於一、兩個月前已日日做Gym減磅。對於稍後舉行的書展將會成寫真集戰場，Anita透露今年會加入戰團，於上周已完成拍攝，問到會視哪位女星的寫真集為勁敵？她謂：「我都唔知邊個出書，原本我係想上年出，但因為甲狀腺出問題，個人肥咗成個碼，今次係我第一本寫真集，應該會用番『崔碧珈』個名做書名。（寫真集有咩特別賣點？）我走運動路線型。（會唔會有大膽裸露鏡頭？）一定唔會三點盡露，但有性感嘢畀大家睇，露點就得眼睛嗰點。」
陳潔玲輸蝕
自言近日化身白兔仔的Alycia，透露只以生菜、沙律菜等充飢來Keep身形，決定完騷後食大餐作獎勵，問夏天是否多接泳衣騷？她謂：「Keep住都有，所以食完大餐後要再Keep，之後公司會有啲game show要着泳衣嘅。」同場的Christy及沙律均是處女下海行泳衣騷，對於穿一件頭泳衣出場甚輸蝕，Christy笑謂：「係囉！佢哋身材好離地，唔係人類嚟o架！」沙律就稱：「唔緊要，每個人有唔同特點，我自己幾平均，同埋不嬲有做運動，冇特別為活動操弗身形。」
文：影視組