呂慧儀任囝囝玩嘢 陸永要囡囡開心
當「贏在射精前」已經成為時下港媽可以毫無懼色宣之於口的一種信念，證明社會的教育制度的確出了問題，而且早於上一代已出事。育有一對千金的陸永，以及暫時只有一名兒子的呂慧儀，同樣無可避免地要目送子女一步步跌入這個「強迫教育」的大熔爐。在一個家長們陸續變成怪獸的社會，陸永與呂慧儀拒絕隨波逐流變犀牛，無論射精前或後，都堅決拒絕做堅離地怪獸家長！
返一日學 冇咗半條命
陸：陸永、呂：呂慧儀
陸永與呂慧儀同為1982年出生，陸永育有一對分別4歲及3歲的寶貝女一穎及一心，呂慧儀則有一名1歲兒子柏翹，兩位人父、人母雖然都與本地普羅父母一樣，要與子女共同面對本地種種已將「強迫」發揮到極致的奇怪教育生態，但兩人為無綫節目《沒有起跑線？》分別做了一日小學生及幼稚園生後，均戥子女將來辛苦，情願傾盡全力阻止子女過早接觸畸形管教方式、過量興趣班等種種足以令小朋友對學習提早反感的苦難。
呂：我為咗個節目做咗一日幼稚園學生，返咗兩間幼稚園，原來依家真係有家長上晝畀小朋友返一間，下晝返另一間幼稚園，我返咗一日，已經冇咗半條人命，放學仲要學電腦程式編碼，同跟國家隊出身嘅游泳教練上游泳班。
陸：我就返咗間只可以講英文同普通話嘅小學，放學返咗田徑、朗誦、儀態、色士風、升中面試等興趣班，但我只係小學二年班！我唔會畀我啲女讀根本唔係佢哋興趣嘅興趣班，但有啲家長會話：「讀興趣班唔係畀仔女去玩，係為張證書！」
被迫做半人獸
呂：其實好多家長都唔想做怪獸，但環境逼成，惟有做半人獸！依家嘅幼稚園生已經學電腦程式編寫，呢啲我讀大學至學o架！我個仔仲細，我會想佢喺投入之後嗰十幾年學習生涯之前，「盡情玩啦，唔該！」
陸：依家的確有啲心態係贏在受精前，乜都諗定、報定，其實有邊個父母唔想仔女開心，但好多時受唔住同輩、親友、社會氛圍壓力，最後都係跟大隊，若然係咁，不妨提住自己，要令仔女開心啲，事事過到人過到自己就算囉！
快樂童年 食玩瞓
呂：我都好驚依家嘅社會氛圍，逼人變成怪獸家長，諗番我佗B嗰時，有啲大肚媽媽已經諗點幫BB報小學，係小學！其實就算push到仔女入名校，但佢讀得吃力，考包尾或中下游，佢咪要不斷喺挫敗中成長？咁好可憐，學習、學校生活只係成長一部分，唔可以因為想佢讀名校，做博士、律師就push佢！返興趣班都係，一定要留意，佢冇興趣就唔好逼佢！
唔想囡囡捱苦「頭」
陸：我都唔驚啲女升學計分會輸蝕，我情願盡量畀佢哋開心咗個頭先，做人永遠係你個頭愈開心，之後幾難都愈容易應付！如果要一開始就搞到好辛苦，每樣嘢都要為之後嗰個辛苦做準備，咁應該出世嗰日已經要開始辛苦，我覺得畀小朋友遲啲至面對辛苦，點都好過提早辛苦！
呂：對比我哋細個讀書嗰個年代，我覺得依家嘅小朋友未試過原來冇功課係可以咁爽！我讀小學之前，係冇功課，生活就係玩、食同瞓覺，依家啲幼稚園學生好多興趣班上，我細個同家姐冇嘢做就攞本copy book嚟鬥寫，兄弟姊妹冇嘢玩就搵嘢玩，鬥快摺衫、掃地，我覺得我童年好開心，我希望依家嘅小朋友都搵到快樂泉源！
星媽扮勇敢 星爸要死頂
陸：我都好想我兩個女鬥快摺衫、掃地，而唔係鬥快倒瀉嘢，或者鬥食飯唔肯坐定定！佢哋細個都肯坐好，唔知大個抽起邊條筋，依家我食飯就點都唔郁，叫佢哋睇住我！我覺得育兒最困難係點樣做自己！因為你做完啲乜，仔女未必即刻學，但過一排，佢會無端端講，或者做番同你一樣嘅反應出嚟，所以父母唔使特別做啲咩，若果你講一套做一套，佢都係睇你做嗰套，你係咩人，佢就係咩人！
父母身教最緊要
呂：我好認同身教，因為父母就係仔女第一個老師，以前我見蜘蛛會驚到閃開，依家會死頂，有次屋企有好大隻蚊飛入嚟，我扮鎮定咁話：「仔，我哋返入房，我叫隻蚊唔好飛入嚟好冇？」抱咗個仔入房後，我極速打死隻蚊，再用消毒紙巾抹，以前我唔會咁做，因為拍死隻蚊，個牆又污糟，依家只想最短時間搞掂佢，做咗阿媽之後，我成日扮勇敢！
陸：唔只要死頂，仲要唔怕攰，你諗吓，當你放咗工仲要陪仔女玩個幾兩個鐘至有得休息，係好辛苦o架，湊仔一定辛苦過返工！但當啲細路衝晒埋嚟，講到尾，你都開心嘅！呢種辛苦係你預咗，亦唔使周圍同人講有幾辛苦，因為個個都係咁！
後記：親子樂無價
陸永與呂慧儀不做怪獸家長，拒絕對孩子揠苗助長，兩位情願「輸在射精前與後」的家長，均認為與其假手他人去催谷孩子，不如親力親為與孩子相處，餵兩女吃飯，為兒子趕蚊。究竟有幾多父母因為自己懶於親子，才替孩子瘋狂報讀興趣班，令孩子們攰到無法「爸爸，玩打交」？天曉得！再多的興趣班，最後還不是「紅的變了牆上的一抹蚊子血，白的是衣服上的一粒飯黏子」（張愛玲《紅玫瑰與白玫瑰》），又有何用？
文：影視組
攝：司徒國榮
呂慧儀服裝：Sinequanone