胡定欣大報復！打到Bobby瞓低

無綫新劇《一屋老友記》昨日在九龍灣舉行宣傳活動，劇中演員Bobby、胡定欣及呂慧儀等跳住彈床支持，三位「老友記」劉江、羅蘭與胡楓亦玩埋一份！其後玩閃避球時，胡楓主動拎波掟Bobby，但因太興奮而險跌倒，而Bobby與胡定欣則互攻，慘食波餅的定欣其後拎起波狂攻Bobby「報仇」，結果打到Bobby瞓低，場面搞笑！

焗「福將」請食飯

向來是「收視福將」的Bobby，謙稱劇集收視報捷並非他一人的功勞：「大家都有出力，每個人都有戲，我個角色同每個人都有啲關係，係公轉同自轉。」曾揚言有10點收視就着比堅尼、15點就游冬泳的他，今次就笑說：「下次宣傳着《壹號皇庭》入面嗰件泳衣出嚟啦！」此外，飾演校長的他亦有收看爆出「贏在射精前」言論的節目《沒有起跑線？》，他說：「睇咗都怕。（因為咁而唔想生BB？）鍾意二人世界多啲，睇完個節目就知決定係啱！」

歐陽震華、胡定欣	胡定欣	滕麗名騎上呂慧儀背脊，認真唔客氣！

胡定欣則直指已感受到Bobby作為「收視福將」的威力，笑言若收視好就叫他請食飯！談到好友陳敏之懷孕，她表示替對方開心，又爆料有圈中好友的太太懷孕：「係圈中人。（胡說八道會朋友？）唔係。（胡杏兒？）唔係。（胡蓓蔚？）唔係。」堅決不肯漏口風！

在劇中勁潑辣的呂慧儀，現實中則大唔透，玩到披頭散髮。	老而彌堅！ 加埋過百六歲的羅蘭（圖）與胡楓齊齊跳彈床，搞到一眾後輩鬼咁緊張！	胡楓

呂慧儀嚇親老公

至於在劇中潑辣又港女的呂慧儀，笑言擔心被觀眾討厭，連老公黃文迪亦怕了她！她透露囝囝亦有收看：「佢好少咁專心睇劇，好奇怪媽咪係咁叫，有八成戲都喺度叫！」她又得戚表示估中敏之佗仔：「女人啲第六感好靈！」

文：影視組