陳豪為天價學費跑數放老婆拍戲

不少家長對小朋友的教育都十分重視，陳豪與陳茵媺這對圈中模範夫婦亦不例外，有指他們為了讓今年12月便3歲的大仔陳梓燁接受外國式教育，不惜豪擲500萬元購買哈羅香港國際學校的資本證券，為兒子買定「入場券」，加埋二仔陳浩鋒與細女Camilla，齋是K1「入場券」已經要1,500萬元！三個小朋友學費不菲，陳豪當然要努力工作，昨日他便跟湯洛雯及黃智賢等宣傳新劇《完美叛侶》，期間玩到差不多瞓地，極為落力！

參觀學校嗌頭痛

談到豪擲500萬為囝囝買學校「入場券」一事，陳豪沒正面回應，只表示現階段仍然搵緊學校：「未決定本地定國際學校，為呢樣嘢頭痛緊！好多學校都睇過，好多都好唔錯，所以仲係磋商階段。」他承認參觀過該貴族學校，問是否唔啱心水？他即時否認，但不願多作評價：「因為咁樣對小朋友唔公平，依家可以話係Open心態搵，有三個仔女就要更加搵好嘅教育制度。」談及將要應付龐大開支，問會否讓老婆復出拍戲幫補？他承認陳茵媺將復工拍戲，但豪言搵學費是男人要肩負的責任，並大讚老婆對演藝有熱誠，不演戲是觀眾損失。

陳豪與老婆陳茵媺錫到仔女燶，當然想為他們搵間好學校。	傳被嫌棄的湯洛雯玩到披頭散髮，似乎心情不俗。	放大圖片

湯洛雯自誇聰明

此外，同場的湯洛雯傳因轉數慢而被一同主持《學是學非》的梁嘉琪嫌棄，她直指說法好笑：「都想幫嘉琪澄清，其實佢對我好好，私下都會約出嚟。（佢話你蠢？）我好聰明o架喎！我喺入面叫『聰明湯』。」

文：影視組