鍾麗緹全家出動趕辦嫁妝

鍾麗緹男友張倫碩早前精心炮製求婚儀式，成功得到女神首肯下嫁，雖然鍾麗緹已為前兩任丈夫分別誕下三名女兒，但仍想為張倫碩繼後香燈，年屆四十五歲的她難免心急，故定於十一月在北京舉行盛大婚禮，盡快趕生。

近日鍾麗緹帶着一家人齊齊來港籌辦嫁妝，前晚她和未婚夫以及十八歲的大女Yasmeen相約友人於銅鑼灣飯敍，至晚上十時半一行人食飽飽站在路邊寒暄，未幾便行去商場登上友人座駕離開。

昨日中午一家人又再出動，今次鍾麗緹帶同三名女兒及張倫碩於酒店門外等車，一家人有傾有講場面溫馨，其後登上一輛七人車直往旺角。鍾麗緹向記者表示帶女兒們睇醫生，她說：「佢哋睇眼，因為睇開所以返嚟睇。」表示會留港至下星期一。

鍾麗緹在下榻酒店外等車。	張倫碩儼如一家之主，帶着鍾麗緹與三名女兒旺角出巡。	鍾麗緹與張倫碩（左）及友人一字排開，傾極唔願走。

海洋主題婚宴

鍾麗緹友善地接受訪問，問到婚紗準備，她直言要和設計師傾一傾，並說：「因為嗰晚會着好多套衫，睇吓佢有咩諗法。」更透露婚禮主題以海洋世界為主，希望每位來賓都可以感受自己如海洋中的小丑魚。記者致電為鍾麗緹設計婚宴服裝的Dorian，他說：「佢好多嘢未定，依家只係度咗身先，未定做幾多套，（會唔會做美人魚衫配合主題？）唔得喎，佢要跳舞，遲啲佢會再嚟香港，到時再傾。」

文、攝：追蹤組