羅鈞滿醉駕免坐監
無綫藝人羅鈞滿昨日到法院就醉駕聽取判刑，他被判100小時社會服務令、停牌2年及需要參與駕駛改進課程，免除牢獄之災的他說：「我覺得好後悔，承諾唔會再做同樣事情。」
屢次涉及交通事故的無綫藝人羅鈞滿，今年3月底被《東網》率先報道再涉醉駕，他昨晨在經理人陪同下現身觀塘裁判法院聽取判刑。身穿深色西裝的他由法院後門進入，記者要求下才走到正門影相，但未有回應提問，心情明顯緊張。進入法庭後，羅鈞滿仍不時緊張得抿嘴，聽取法庭人員講解時，又不自覺緊握雙手，似擔心會被判入獄，最終他被判100小時社會服務令、停牌2年及需參與駕駛改進課程，若未能依期完成社服令，不排除會改判他坐監。聞判後羅鈞滿如釋重負說：「我覺得好後悔，承諾唔會再做同樣事情。」
自責令家人擔心
羅鈞滿步出法庭後表示：「尊重法庭判決，希望參與無償工作回饋社會，畀我有時間反省，或者我唔應該再咁執着自己諗法。我事發後都唔敢揸車。（仲飲唔飲酒？）應酬上會作出選擇，冇必要唔飲，飲完都會離開架車，我都擔心事件影響形象，希望得到教訓，感激曾經送上問候嘅同事。」他又自愧對不起家人：「好對唔住屋企人，依家鬆口氣。（之前有預計要坐監？）有做過最壞打算，都知呢個刑罰可能去到監禁，我由第一堂開始已經冇請律師，係想一人做事一人當。（怕TVB同你終止合作？）都明白合約有呢方面嘅條款，之前有劇被抽起（易角），我會承擔後果，依家暫時冇工作。」
羅鈞滿指曾夢見自己上庭：「尋晚諗住早啲瞓，但凌晨五點醒咗，望住天光，有啲沉思，之前夢過自己上法庭，令我知道唔好再做呢種事，唔好令屋企人傷心。（父母有為你喊？）知道佢哋擔心我，爸爸雖然唔多出聲，但都擔心，今後做事會諗清楚。今日父母冇嚟聽審，我晏啲會同佢哋食飯，因為屋企人最緊要。」他完成訪問後離開，由經理人充當司機。
監製王心慰：唔搵佢演住
無綫企業傳訊部副總監曾醒明昨日說：「公司會進一步了解羅鈞滿跟感化官見面後有關其社會服務令的安排情況，才重新編排工作。」監製王心慰被問到會否重用羅鈞滿演出被易角的角色？他說：「因為角色已定晒，劇集已開拍一段時間，唔會搵佢演住。」羅鈞滿的好友樂瞳則說：「希望佢飲少啲，望大家畀機會佢。」「波友」馬國明則謂「希望大家唔好再啄住佢（羅鈞滿）」，因他已受到教訓，見面亦會提醒對方飲咗酒就唔好揸車。
案件編號：KTCC2005/2016
文：影視組