麥明詩仲有得揀：我個森林好大！

王晶監製新劇《賭城群英會》昨日於無綫將軍澳電視城舉行晒冷記者會，佘詩曼、馬國明、陳法蓉、高海寧（高Ling）、沈卓盈、鍾采羲及文凱玲等出席造勢。最近與大律師男友林作情海翻波的Louisa，與被指近期力追她的Dominic同場亮相，成為焦點！在新劇中，Dominic與Louisa及高海寧譜三角戀，問現實生活中誰是男友？Louisa說：「我同Dominic戲入面係一對啫！」

拍拖講Feel唔講錢

至於林作是否仍是男友？Louisa沒有正面回應：「大家冷靜中。（因為佢被影到攬女？）個心係有唔舒服，但我唔會將呢件事放大，我哋兩個都有問題，呢段時間都有聯絡、溝通、見面。（之前畀人影到你喊？）呢次之外都有見面。（你做咩喊呀？）我一向眼淺，兩個人嘅嘢涉及情緒，我就會喊，但唔係咁大件事。」

王晶率領一眾演員切燒豬，為新劇造勢！	傳出Dominic力追Louisa後兩人首次同場，尷尬到暈！	阿佘笑到手舞足蹈，唔知咩事咁開心？

問會否原諒男友？Louisa直言會嘗試去「醫」這段情，但未知能否「痊愈」：「如果注定就會喺番埋一齊。（林作媽咪打畀你？）傾幾句。（佢做中間人？）都係關心我。（放假陪吓男友？）我之後要去巴西奧運，到時專心工作，唔喺香港心情都好啲。（冷靜期幾耐？）我冇時間表。（冷靜完之後結婚？）呢幾年都唔會，但世事冇絕對。」

封胸的高Ling轉騷長腿，一樣咁煞食！

身材較嬌小的鍾采羲低胸出「線」！

對於有指林作母親以6,500萬元買樓給他們結婚之用，Louisa稱聽聞對方只是投資，並指拍拖是講Feel，與經濟完全無關。對於有指最近被Dominic力追，她笑說：「佢做戲認真，好專業，好願意幫新人！（若果佢力追你，會揀邊個？）若果我單身，應該唔止得兩個選擇，我個森林好大，哈哈！」

鍾采羲低胸搶鏡

另外，問Dominic會否作歌追Louisa？他即否認追求：「大家唔同類型，我係藝人，佢係律師，好難話挑機。（係咪追Louisa？）梗係唔係啦！」

至於同場的佘詩曼沒有接受傳媒訪問便離開，而高海寧亦相當錫身，不及低胸上陣的鍾采羲性感，不過兩人在席上見到即將轉任無綫企業傳訊部顧問的曾醒明時，都有上前噓寒問暖，並拍照留念。

文：影視組