巧瑩進擊求偶 教劉佩玥搶攻
劉佩玥（Moon）與歐陽巧瑩（Tammy）乃同屆港姐，Tammy冷若冰霜，Moon卻熱情如火，冰，最終還是給火融化了。冰火交融的Moon和Tammy，即使感情事也毫無保留。Tammy交朋結友雖較為被動，在戀愛路上卻完全進取，自爆主動追求林師傑，花了一星期成功「師有化」；相反Moon對感情事卻有點忸怩，經常處於十字路口徘徘徊徊，愛帶閨蜜回家談心，卻被懷疑是同性戀者。
歐陽：歐陽巧瑩 劉：劉佩玥
二人因競選港姐而結緣，想當日劉佩玥與其他佳麗傾得忘形沒停過口，冷眼旁觀的歐陽巧瑩竟流露不屑神情。
劉：記得港姐第二次見評判時，我心諗呢個女仔一定入圍，太有氣場，雖然唔係好望人，一齊坐都唔講嘢……當時我同陳凱琳好嘈，仲畀監護人話如果再嘈就分開我哋，當時你眼神好不屑。
歐陽：呢兩個人好奇怪，一坐低冇停過講嘢，之後你兩個撩我玩，開始我係唔情願，但佢兩個好high，嗰陣隔籬再隔籬就係蔡思貝，佢又會同人玩，大家都咁就玩吓。
劉：你外表太型，我只係骨子裏。
女人軀殼的男人
歐陽：你係有女人軀殼嘅男人，可能你同細佬關係好，我同細妹玩所以好女人，好在有你同思貝兩個奇怪人喺度搞風搞雨，否則就一直坐喺度，我哋選完都有Keep住聯絡，只係唔會成日四個一齊，時間好難就。
劉：我屋企係好嘈，Tammy同家人相處模式剛好相反，有次我媽咪叫佢嚟打邊爐就發生咗件事。
歐陽：正常人坐喺度食飯，你可以無啦啦垂直90度跌落地下，件事到依家都好費解……仲有你爸爸好靚仔，媽咪同你好似樣，細佬印象唔深。
劉：你嚟我屋企一直唔出聲，原來係唔知同人講乜好。
歐陽：如果我係男仔會追你，你識轉化人、煮飯、孝順父母、鍾意笑，又多蝦碌嘢，娶個老婆返嚟蠢得嚟有時又有啲醒。依家我心態係大家互相幫忙，好在係男友（林師傑）喺呢行5、6年，有咩唔明佢都可以袋少少錢去我度。
歐陽巧瑩與男友打得火熱，不過她頗有神婆本色，深信命中注定不能早婚。至於劉佩玥則閨中蜜友多過裙下之臣，性取向受到質疑。
劉：我見證住你兩個由朋友變成情侶，唔知邊個嘅錯，哈！見你哋相處模式好有趣。
歐陽：佢有樣嘢好，係成日會作歌，歌詞仲好露骨，亂咁作，好似「歐陽巧瑩你好咩？歐陽巧瑩你真好命……」並唔係大家諗嘅情歌。
劉：本來覺得林師傑幾有才華，依家有少少懷疑。
歐陽：咁又唔可以質疑佢才華，因為呢個只係用咗兩秒時間去作，一彈已係咁，都係幾叻。佢係我智囊團，無論對朋友、家人都幫我好多，我太懶，佢好熱情，有時會提醒我，好似畀啲愛媽咪，依家我都開朗咗，佢近排仲教我彈結他。
劉：好Sweet呀！咁幾時結婚？
唔介意再買消夜
歐陽：唔好搞呢啲嘢，因為我讀過玄學，睇過大家條命係唔可以早婚，我早婚會有兩個老公，佢就會離婚收場，所以我哋有共識，講呢啲傷感情，最緊要活在當下。
劉：我感情生活就一片空白，影到嘅都係朋友，覺得買消夜係朋友都會做，只因對方係有身份嘅何家公子，我係藝人，不過都係得啖笑，冇尷尬。（再買消夜？）唔排除有呢個可能性，其實媽咪都問我係咪有人追，不過我而家同工作拍拖。
歐陽：你媽咪可能擔心你成日帶啲女仔返屋企，其實你係咪同性戀？
劉：唔係囉！我細佬都有擔心過。
劉佩玥感情一片空白，相反，歐陽巧瑩就勝在直截了當，上演一幕「木偶奇遇記」，把林師傑私有化。
歐陽：畀人影到會有可能弄假成真，我就梗係唔係啦！
劉：我弄假成真難啲，伍允龍？
歐陽：呢個我覺得難啲，因為我覺得你唔係鍾意呢類型，你鍾意咁大隻咩？
劉：我鍾意好瘦削咩？緋聞男友即係假啦！同佢拍劇先識，佢戲內好得意，冷冰冰幾好睇，現實佢係好好朋友，又係基督徒，年紀大少少，教到我好多嘢，佢拍電影多，我又係讀電影，好投契。
歐陽：冷冰冰嘅人會好鍾意你，係友情嗰啲。
劉：分析都啱，不過我現時感情空白，冇嘢可以share。
蘇州過後冇艇搭
歐陽：希望有日你會同我講！其實啲人成日話師傑溝女，我想講當日係我主動，記得係平安夜前追，佢一直想推開我，因為對自己冇咩信心。第一次追男仔，以前拍拖都係朋友轉化，今次係見得多傾多咗，先下定決心，用咗一星期追佢，當然都知佢有意思，不過我份人好急，等人出聲不如我直接講我好鍾意你。
劉：我唔得呀！
歐陽：我驚玩曖昧，唔享受，係就係啦！
劉：我呢個時間會忸怩。
歐陽：蘇州過後冇艇搭。
劉：我都明，好多人以為我多人追，其實冇人追，身邊人會介紹朋友畀我識，但我推咗，覺得唔需要搵一個人去填滿我感情生活，我叫姊妹係老婆，咁多個女神級朋友已好飽。
後記
Tammy與Moon均是新一代女神，不過拍攝當日要求兩人扮cute，Moon二話不說擺出多個cute爆甫士，惟Tammy嘟嘴不到兩秒便掩嘴大笑，並謂：「我真係唔得，就連最簡單嘅單眼都做唔到，好難！唔明點解你做得咁自然，可唔可以教吓我？」而性格開朗的Moon，於訪問時談得興高采烈，不自覺地放大聲線，引來Tammy着她把聲浪收細，場面惹笑！
文：影視組
攝：吳文聰